شکاگونیویارک : 19جنوری ( ایجنسی ) امریکہ کے شکاگو ائیرپورٹ سے ایک شخص کو گرفتار کیا گیا ہے جو تین ماہ تک ہوائی اڈے کے اندر چھپا رہا۔ اس کا کہنا ہے کہ وہ کورونا کے خوف سے جہاز پر سفر کرنے سے گریز کر رہا تھا۔چھتیس سالہ بھارتی نژادآدتیہ سنگھ کا تعلق ریاست کیلفورنیا سے ہے۔
انہیں پولیس نے ہفتہ کو شکاگو کے اوہیئر بین الاقوامی ہوائی اڈے سے گرفتار کیا۔ ان پر ایک ممنوعہ علاقہ میں غیر قانونی طورپر داخل ہونے اور وہا ں رہنے کا الزام ہے۔پولیس کو اپنے بیان میں انہوں نے کہا کہ وہ کورونا سے خوف زدہ تھے اور گھر واپس سفر نہیں کرنا چاہتے تھے۔ ان پر ائیرپورٹ سکیورٹی کے ایک اہلکار کا بیگ چرانے کا بھی الزام عائد کیا گیا ہے۔
کک کاؤنٹی کی جج سوزانا اورٹیز نے ادیتیہ سنگھ کو ایک ہزار ڈالر جرمانہ ادا کرنے کے بعد رہا کرنے کی اجازت دے دی ،تاہم سنگھ کو حکم دیا کہ وہ آئندہ سے ہوائی اڈے میں قدم نہ رکھے۔ جج نے اس بات پر حیرت کا اظہار کیا کہ آخر کوئی شخص ایک سکیورٹی ایریا میں اتنے دنوں تک کیسے رہ سکتا ہے۔ سنگھ دس اکتوبر سن 2020 سے سولہ جنوری سن 2021 تک ہوائی اڈے پر رہے اور اس کے بارے میں کسی کو پتہ ہی نہ چل سکا۔جج نے مزید کہا کہ اس دوران جو کچھ بھی ہوا اور عدالت کو جو واقعات اور حقائق بتائے گئے ہیں وہ انتہائی حیران کن ہیں۔ ہوائی اڈہ ایک محفوظ جگہ ہے اور ایک شخص فرضی شناختی بیج کے ذریعہ اتنے دنوں تک وہاں موجود رہا۔
سفر کے لیے ہوائی اڈے کا پوری طرح محفوظ ہونا ضروری ہے۔وکیل استغاثہ نے بتایا کہ یونائٹیڈ ایئرلائنز کے دو ملازمین کی نگاہ آدتیہ سنگھ پر پڑی اور وہ انہیں کچھ مشکوک لگا۔ جب سنگھ سے ان کی شناخت معلوم کی گئی تو انہوں نے ایک بیگ دکھایا جو اس ممنوعہ علاقے کے ایک آپریشن منیجر کا تھا۔ منیجر نے گزشتہ اکتوبر میں اپنا بیگ کھوجانے کی شکایت درج کرائی تھی۔ائیرلائن اسٹاف نے معاملے کی پولیس کو خبرکی جس کے بعد سنگھ کو گرفتار کرلیا گیا۔
