نئی دہلی:(اردودنیا.اِن)ہندوستان میں کرونا کی دوسری لہر کے دوران کچھ نئے اسٹرین سامنے آئے ہیں ،جس نے ڈاکٹروں اور سائنسدانوں کی فکر بڑھا دی ہے ۔ ان نئے اسٹرین میں ’برازیلی اسٹرین‘ بھی شامل ہے، جس کو لے کر ایک خوف کا عالم ہے۔ دراصل یہ برازیلی اسٹرین بچوں کے لیے زیادہ خطرناک ثابت ہو رہا ہے۔
موصول خبروں کے مطابق ہندوستان میں کورونا کے تین نئے اسٹرین کے بارے میں پتہ چلا ہے ،جن میں سب سے زیادہ خطرناک برازیل کا وائرس ہے۔ اس برازیلی اسٹرین کو بچوں کا جانی دشمن کہا گیا ہے۔بتایا جا رہا ہے کہ بچوں کے لیے تین ممالک سے ہندوستان پہنچے وائرس سب سے زیادہ خطرناک ثابت ہو رہے ہیں اور وہ تین ممالک یہ ہیں، برطانیہ، جنوبی افریقہ اور برازیل۔ ماہرین کا کہنا ہے کہ برازیل کا وائرس سب سے زیادہ خطرناک ہے، جو کہ تقریباً 15 ممالک میں بچوں پر اپنا قہر برپا کر رہا ہے۔
صرف ہندوستان میں ہی تقریباً 80 ہزار بچے کورونا کی زد میں آ چکے ہیں اور کچھ ریاستوں میں تو برازیلی اسٹرین کے باعث بچے فوت بھی ہوگئے ہیں ۔ماہرین کا کہنا ہے کہ برازیلی اسٹرین خصوصی طور پر 8 مہینے سے 5 سال کے بچوں کے لیے زیادہ خطرناک ہے،
اس لیے چھوٹے بچوں پر بہت زیادہ توجہ دینے کی ضرورت ہے۔واضح ہوکہ مہاراشٹر، اتر پردیش، چھتیس گڑھ اور دہلی جیسی ریاستوں میں اس برازیلی وائرس کا بہت زیادہ اثر بچوں پر دیکھنے کو ملا ہے۔
