ممبئی:(اردودنیا.اِن/ایجنسیاں)کورونا وائرس کے بڑھتے انفیکشن کے درمیان مشہور فلم اداکارہ اور متھرا سے رکن پارلیمنٹ ہیما مالنی نے برج علاقہ کے کسانوں سے اپیل کی ہے کہ وہ صحیح وقت پر اور صحیح جگہ پر کووڈ کا ٹیکہ ضرور لگوائیں تاکہ وہ خود کو، اپنی فیملی کو اور ملک کو کورونا وائرس جیسی وبا سے بچا سکیں۔
ہیما مالنی نے پیر کے روز اپنے علاقائی نمائندہ جناردن شرما کے ذریعہ سے جاری ویڈیو پیغام میں کہا کہ میں آپ کی ہیما مالنی متھرا-ورنداون اور برج کے سبھی گاوں میں رہنے والے دن رات کھیتوں میں پسینہ بہانے والے کسان بہن-بھائیوں سے درخواست کرنا چاہتی ہوں کہ وہ کورونا وبا کی اس دوسری لہر کا صبر کے ساتھ مقابلہ کریں۔
انھوں نے مزید کہا کہ کورونا وائرس انفیکشن سے بچاو کے لیے ٹیکہ کاری پروگرام میں حصہ ضرور لیجیے۔ ٹیکہ ضررو لگوائیے۔ یہ دیکھا گیا ہے کہ جن لوگوں نے ٹیکہ لگوایا ہے، ان پر کورونا کا سنگین اثر نہیں ہوا ہے، میں نے بھی اس کی دونوں خوراک لے لی ہیں۔ آپ بھی جلد از جلد رجسٹریشن کروائیے۔
