تشدد مسئلے کا حل نہیں ، راہول گاندھی،شیوسیناو ششی تھرور وعام آدمی پارٹی کا رد عمل

نئی دہلی :(اردودنیا.اِن) کسانوں کی ٹریکٹر پریڈ نے دہلی کی سڑکوں پر تشدد کی شکل اختیار کرلیا ہے۔ منگل کے روز دہلی کے مختلف علاقوں میں تشدد ہوا۔ ادھر کانگریس کے رہنما راہل گاندھی نے اس تشدد کی مذمت کی ہے۔ راہل گاندھی نے ٹویٹ کیا ہے کہ تشدد کسی بھی مسئلے کا حل نہیں ہے۔ چوٹ کسی کو بھی لگے ،

نقصان ہمارے ملک کا ہی ہوگا۔ ملک کے مفاد کے لئے زرعی مخالف قانون کو واپس لیں! دہلی سے بھارتیہ جنتا پارٹی کے رکن پارلیمنٹ اور سابق کرکٹر گوتم گمبھیر کی جانب سے بھی اپیل کی گئی ہے کہ تشدد کو روکا جائے ، تشدد کے ذریعے کوئی حل نہیں نکلے گا۔واضح رہے کہ یوم جمہوریہ کے موقع پر کسانوں نے ٹریکٹر ریلی نکالنے کی بات کی تھی۔

لیکن منگل کی صبح سے ہی دہلی کی مختلف سرحدوں پر تشدد کی صورتحال پیدا ہوگئی ہے۔ دہلی کے غازی پور بارڈر ، آئی ٹی او اور دیگر کئی علاقوں میں پولیس اور مظاہرین کے درمیان جھڑپ ہوئی ہے۔

 

منگل کے روزبے قابوہجوم لال قلعہ کمپلیکس میں داخل ہوا اور وہ جھنڈا اپنے ساتھ لایاتھا۔ کانگریس کے رہنما اور سابق مرکزی وزیر ششی تھرور نے اس طرزعمل پر کڑی تنقید کی ہے۔ انہوں نے کہاہے کہ اگرچہ وہ کسانوں کی تحریک کی حمایت میں ہیں ، لیکن وہ تشددکوبرداشت نہیں کرسکتے ہیں۔ششی تھرور نے ایک ٹویٹ میں لکھاہے کہ بہت افسوسناک ہے۔میں نے احتجاج کے آغاز سے ہی کسانوں کی حمایت کی ہے لیکن میں افراتفری کو برداشت نہیں کرسکتا۔ اور یوم جمہوریہ کے موقع پر کوئی جھنڈا نہیں ، لال قلعے پر صرف ترنگالہرایاجاناچاہیے۔

شیوسینا کی لیڈر اور ممبر پارلیمنٹ پرینکا چترودی نے بھی اس واقعے کی مذمت کرتے ہوئے کہا ہے کہ جمہوریت میں کسی بھی طرح کا تشدد قابل برداشت نہیں ہے۔ پرینکا چترویدی نے ٹویٹ کیاہے کہ لال قلعے پر ہونے والے مظاہروں کی پریشان کن تصاویر قابوسے باہر ہوگئیں۔ کسی بھی حالت میں ترنگے کے تئیں بے عزتی برداشت نہیں کی جاسکتی ہے۔جمہوریت میں کسی بھی طرح کی تشدد کو قبول نہیں کیا جاسکتا۔ قانون سب سے اوپرہے۔ کوئی فریق نہیں جیتا ، ملک ہارگیا۔ جمہوریت کے لیے افسوسناک دن۔

پارٹی نے کہا ہے کہ ہم اس مظاہرے کے دوران ہونے والے تشدد کی پرزور مذمت کرتے ہیں۔ یہ افسوسناک ہے کہ مرکزی حکومت نے اس حد تک صورتحال کو خراب کرنے کی اجازت دی ہے۔ پچھلے دوماہ سے جاری یہ تحریک پْر امن ہے۔ کسان رہنماؤں نے کہاہے کہ جو لوگ آج تشدد میں ملوث رہے ہیں وہ اس تحریک کا حصہ نہیں تھے بلکہ غیرسماجی عناصر تھے۔ جو بھی تھا،لیکن یقینا اس تشددنے اس تحریک کوکمزورکردیا ہے جو آج تک پْرامن اور نظم وضبط سے چل رہی تھی۔ ہم آپ کو بتادیں کہ مرکزکے زرعی قوانین کے خلاف کسانوں کے احتجاج نے منگل کو پرتشدد شکل اختیار کرلی۔

یوم جمہوریہ پر ٹریکٹر ریلی کے دوران کسانوں نے زبردست لڑائی کی اور مقررہ راستے سے نکل کر وسطی دہلی میں داخل ہوئے۔ اسی دوران کسانوں کا ایک گروہ ٹریکٹروں میں سوار ہوا اور لال قلعے میں داخل ہوا۔ دہلی میں ہنگامہ برپا کرنے والے کسانوں کو روکنے کے لیے پولیس کوشش کرتی رہی۔

اس سے قبل پولیس نے ان کاشتکاروں پر آنسو گیس کے گولے اور لاٹھی چارج کیا تھا جو دہلی کی مختلف سرحدوں پر ٹریکٹر کے ذریعے قبل از وقت بیریکیڈ نہ ہٹانے اور قومی دارالحکومت میں ٹریکٹر پریڈ کرنے کے لیے مقررہ راستے پر عمل نہ کرنے پراحتجاج کر رہے تھے۔

 

آر جے ڈی لیڈر منوج جھا نے ایک بیان جاری کیا ہے کہ آج جو کچھ بھی ہوا وہ غلط ہے ، لیکن اس واقعے کی بنیادپر آپ 60 دن سے جاری تحریک کوغلط نہیں بتا سکتے۔ انہوں نے آج کے واقعے کی تحقیقات کا مطالبہ بھی کیاہے۔ یہاں کانگریس کے لیڈر راہل گاندھی نے بھی کہا ہے کہ تشدد کسی بھی مسئلے کا حل نہیں ہے۔ اگر کسی کو تکلیف پہنچتی ہے تونقصان صرف ہمارے ملک کا ہوگا۔ ملک کی خاطر زرعی انسداد قانون کو واپس لے لیناچاہیے۔