نئی دہلی:(اردودنیا.اِن)دہلی حکومت نے سرکاری طور پر اعتراف کیا ہے کہ دہلی میں کورونا کم نہیں ہورہا ہے۔ اس کے پیش نظر دہلی میں لاک ڈاؤن کی مدت میں توسیع کردی گئی ہے۔ دہلی میں لاک ڈاؤن پیر 3 مئی کو صبح 5 بجے تک رہے گا۔ وزیر اعلی اروند کجریوال نے اس کا اعلان کیا ہے۔
نیز انہوں نے کہا ہے کہ دارالحکومت میں ابھی بھی آکسیجن کی کمی ہے۔وزیراعلی کجریوال نے کہاکہ کورونا دہلی میں تباہی مچا رہی ہے، دہلی میں لاک ڈائو اگلے پیر کی صبح 5 بجے تک بڑھایا جارہا ہے۔ لاک ڈاؤن کے دوران ہم نے دیکھا کہ مثبت شرح تقریبا 36-37 فیصد تک پہنچ گئی ہے، ہم نے آج تک دہلی میں انفیکشن کی ایسی شرح نہیں دیکھی ہے۔ پچھلے ایک یا دو دن سے انفیکشن کی شرح میں قدرے کمی آئی ہے اور آج یہ کم ہوکر 30 فیصد رہ گئی ہے۔
کجریوال نے مزید کہاکہ دہلی کو 700 ٹن آکسیجن کی ضرورت ہے، ہمیں مرکزی حکومت کی طرف سے 480 ٹن آکسیجن مختص کی گئی ہے اور کل مرکزی حکومت نے 10 ٹن مزید مختص کی ہے، اب دہلی کو 490 ٹن آکسیجن مختص کیا گیا ہے لیکن یہ سارا مختص بھی دہلی نہیں آرہا ہے،
کل 330-335 ٹن آکسیجن دہلی پہنچا، ہم نے آکسیجن کے انتظام کے لئے ایک پورٹل تیار کیا ہے۔ صنعت سے لے کر اسپتال تک ہر ایک کو ہر دو گھنٹے میں اپنی آکسیجن صورتحال کی اطلاع دینی ہوگی۔ مرکزی حکومت کی طرف سے بہت تعاون حاصل ہے، مرکزی اور دہلی حکومتیں مل کر کام کر رہی ہیں۔
