عالمی ادارۂ صحت نے ایسٹرا زینیکا ویکسین کی منظوری دے دی

 

جینوا : (ایجنسیاں)ایسٹرا زینیکا ویکسین کی ہنگامی منظوری غریب ممالک کے لیے بہتر اور مناسب اقدام قرار دی گئی ہے۔ اس ویکسین کی منظوری یقینی طور پر کورونا وائرس کی وبا کے خلاف ایک حفاظتی دیوار ثابت ہو سکتی ہے۔ورلڈ ہیلتھ آ رگنائزیشن کی طرف سے منظوری کے بعد اس بات کا قوی امکان ہے کہ کم اور درمیانی معاشی حالت رکھنے والے ممالک میں بھی کووڈ انیس کی مہلک بیماری کے خلاف مدافعتی ویکسین لگانے کا سلسلہ رواں ماہ کے اختتام پر شروع ہو سکتا ہے۔

امید کی جا رہی ہے کہ غریب ممالک میں کورونا کی وبا کے خلاف ویکسین لگانے کا پروگرام امیر ملکوں میں ویکسی نیشن کے سلسلے کی طرح ہی جاری رکھا جائے گا۔اقوام متحدہ کے صحت کے ادارے کا کہنا ہے کہ رواں برس کے وسط تک تین سو چھتیس ملین خوراکیں مختلف غریب ملکوں کو فراہم کی جائیں گی اور دسمبر کے آخر تک ویکسی نیشن میں تسلسل کے لیے فراہم کردہ اس کی خوراکوں کی تعداد دو بلین کے برابر ہو جائے گی۔

بائیو این ٹیک فائزر اور موڈیرنا کی ویکسینوں کے مقابلے میں ایسٹرا زینیکاآکسفورڈ کی تیار کردہ ویکسین خاصی سستی ہے۔ یہ ویکسین برطانیہ کی آکسفورڈ یونیورسٹی اور سویڈش کمپنی ایسٹرا زینیکا نے مشترکہ طور پر تیار کی ہے۔ڈبلیو ایچ او کا کہنا ہے کہ رواں برس کے وسط تک 336 ملین خوراکیں مختلف غریب ملکوں کو فراہم کی جائیں گی۔عالمی ادارہ صحت کی جانب سے خریدے جانے کے بعد غریب ملکوں کو ویکسین کی فراہمی عالمی کورونا ویکسی نیشن پرگرام یا کوویکس (COVAX) کے تحت کی جائے گی۔

اس پروگرام کے تحت ویکسین صرف ایک کمپنی سے نہیں بلکہ کئی کمپنیوں سے لی جائے گی۔دیگر کمپنیوں میں سے بائیو این ٹیک فائزر اور موڈیرنا خاص طور پر نمایاں ہیں۔

یہ امر اہم ہے کہ جرمنی میں تیار ہونے والی بائیو این ٹیک فائزر ویکسین کو انتہائی سرد اسٹوریج میں رکھنا لازمی ہوتا ہے ورنہ اس کا اثر زائل ہو سکتا ہے۔