نئی دہلی: (اردودنیا.اِن)لوک سبھا کے اسپیکر اوم برلا کو 20 مارچ کو کورونا وائرس سے متاثر ہونے کے بعد یہاں کے ایمس کووڈ سنٹر میں داخل کرایا گیا ہے اور فی الحال ان کی حالت مستحکم ہے۔ آل انڈیا انسٹی ٹیوٹ آف میڈیکل سائنسز (ایمس) نے اتوار کے روز ایک بیان میں کہا ہے کہ برلا کی حالت مستحکم ہے اور ان کے اہم اعضاء معمول کے مطابق کام کر رہے ہیں۔
اسپتال کے مطابق، 58 سالہ برلا 19 مارچ کو کورونا وائرس سے متاثر پائے گئے تھے اور اگلے ہی دن ایمس کووڈ سنٹر میں مانیٹرنگ کے لئے داخل کیا گیا تھا۔
برلا کے کورونا سے متاثر ہونے کی خبر کے بعد متعدد سیاسی جماعتوں کے لیڈران نے ان کی جلد صحت یابی کی خواہش کی۔ مرکزی وزیر ریلوے پیوش گوئل نے ایک ٹویٹ میں کہا کہ لوک سبھا اسپیکر اوم برلا جی کیلئے بھگوان سے دعاء کرتے ہیں کہ وہ جلد ہی کورونا سے صحت یاب ہوں، مجھے یقین ہے کہ جلد ہی وہ کورونا کو شکست دیں گے اور اسی جوش و جذبے اور توانائی کے ساتھ ایک بار پھر ہماری رہنمائی کریں گے۔
