نئی دہلی :(اردودنیا.اِن)سپریم کورٹ نے مغربی بنگال کے نندیگرام میں وزیر اعلی ممتا بنرجی پر حملے کی تحقیقات سی بی آئی سے کرانے سے انکار کردیا ہے۔ عدالت نے درخواست گزار سے ہائی کورٹ جانے کو کہا ہے۔ جس کے بعد درخواست گزار نے جمعہ کو اپنی درخواست واپس لے لی۔
چیف جسٹس ایس اے بوبڈے نے درخواست گزار سے کہا کہ وہ ہائی کورٹ جائیں۔ دراصل ممتا بنرجی پر حملے کا معاملہ اب سپریم کورٹ میں پہنچا ہے۔ سپریم کورٹ میں پٹیشن دائر کرکے سی بی آئی انکوائری کا مطالبہ کیا گیا تھا۔ جس پر چیف جسٹس نے کہا کہ آپ پہلے ہائی کورٹ جائیں۔ درخواست گزار کا کہنا ہے کہ سی بی آئی حملے کی حقیقت سامنے لاسکتی ہے اور اس طرح ہمدردی کی بنیاد پر سیاستدانوں کو ووٹ حاصل کرنے سے روک سکتی ہے۔
واضح رہے کہ چیف جسٹس کی سربراہی میں تین ججوں کی بنچ نے سپریم کورٹ میں سماعت کی۔دراصل شبھم سکسینہ سمیت تین وکلاء نے ایک عرضی دائر کی تھی ، جس میں سپریم کورٹ سے مطالبہ کیا گیا تھا کہ وہ نندیگرام میں 10 مارچ 2021 کو مغربی بنگال کی وزیر اعلی ممتا بنرجی پر حملے کی تحقیقات کے لئے سی بی آئی کو ہدایت کرے۔
نندیگرام میں سی ایم ممتا بنرجی پر اس وقت حملہ ہوا جب وہ پرچہ نامزدگی کے لئے جارہی تھیں۔ درخواست میں کہا گیا ہے کہ ملک میں آزادانہ ، منصفانہ اور شفاف انتخابات کے بنیادی اصول کو برقرار رکھنے کے لئے مستقبل میں بھی اسی طرح کے واقعات کی جانچ پڑتال کے لئے ہدایات جاری کیے جائیں کیونکہ ان سے انتخابی مشینری متاثر ہوتی ہے۔
درخواست میں انتخابی تشدد پر نگاہ رکھنے اور مجرموں کو سزا دینے اور انتخابی تشدد میں اضافے کی سزا کے ساتھ ایک عارضی ادارہ تشکیل دینے کے لئے ہدایات بھی طلب کیے گئے ہیں۔
