نئی دہلی:(اردودنیا.اِن/ایجنسیاں)وزیر خارجہ ایس جے شنکربروز پیر 24 مئی کو 5روزہ دورے پر امریکہ جائیں گے جہاں وہ امریکی کمپنیوں کے ساتھ مل کر انسداد کووڈ 19 ویکسین، گھریلو پیداوارکیلئے خام مال خریداری اور ویکسین کی مشترکہ پیداوار کے امکان کے بارے میں بات کرنے کا امکان ہے۔وزارت خارجہ سے جاری ایک بیان میں کہا گیا ہے کہ وزیر خارجہ ایس جے شنکر 24 سے 28 مئی 2021 تک امریکہ کا دورہ کریں گے۔
توقع ہے کہ وہ نیویارک میں اقوام متحدہ کے سکریٹری جنرل انتونیو گٹارس سے ملاقات کریں گے۔ وزارت نے کہا کہ جے شنکر واشنگٹن میں امریکی وزیر خارجہ انٹونی بلنکن کے ساتھ تبادلہ خیال کریں گے، وہ امریکی کابینہ کے ممبران اور وہاں کی انتظامیہ کے اعلی عہدیداروں کے ساتھ دوطرفہ تعلقات پر تبادلہ خیال کریں گے۔جنوری میں امریکی صدر جو بائیڈن کے اقتدار سنبھالنے کے بعد یہ کسی سینئر ہندوستانی وزیر کا پہلا دورہ ہوگا۔
ماناجارہاہے کہ اس دورے کے دوران جے شنکر ہندوستان میں انسداد کووڈ 19 ویکسین کی گھریلو پیداوار بڑھانے اور امریکہ سے خام مال کی فراہمی بڑھانے پر بات کرسکتے ہیں، وہ ویکسین کی مشترکہ تیاری کے امکان پر بھی تبادلہ خیال کریں گے۔وزارت کے بیان کے مطابق وزیر خارجہ کے دورے کے دوران ان کا ہندوستان اور امریکہ کے مابین کووڈ 19 کی وبا سے متعلق معاشی اور تعاون پر بات چیت کا پروگرام ہے۔
ہندوستان میں یہ نظریہ بھی رہا ہے کہ امریکی دفاعی پیداوار ایکٹ کے تحت امریکی کمپنیوں کے خام مال کی برآمد پر کچھ پابندیاں عائد کی گئی ہیں۔جے شنکر کاامریکہ کا دورہ ایسے وقت میں ہورہا ہے جب وزارت خارجہ کے ترجمان اریندم باگچی نے ایک دن پہلے ہی کہا تھا کہ ہندوستان امریکی کاروباری اداروں کے ساتھ مل کر کووڈ19 اینٹی ویکسین خریداری اور بعد میں اس کے ملک میں پیداوار کے امکان پر بات کر رہا ہے۔
