نئی دہلی:کانگریس میں صدر کے عہدے کے انتخاب کے لئے بار بار مطالبہ کے درمیان بڑی خبریں سامنے آئی ہیں۔ ذرائع کے مطابق کانگریس صدر کے انتخاب کا جلد اعلان کیا جاسکتا ہے۔ توقع ہے کہ کانگریس ورکنگ کمیٹی (سی ڈبلیو سی) اور کانگریس الیکشن کمیٹی (سی ای سی) کے لئے بھی انتخابات ہوں گے۔ کہا جارہا ہے کہ پوری کارروائی کو مکمل کرنے کے لئے کل 26 دن کا وقت لیا جائے گا۔ انتخابات کی تاریخوں کا اعلان کرنے کے لئے کانگریس ورکنگ کمیٹی کا اجلاس بھی جلد ہی طلب کیا جاسکتا ہے۔یہ خبر ایک ایسے وقت میں آئی ہے جب کانگریس کے سینئر رہنما کپل سبل نے ایک انٹرویو میں پارٹی صدر کے اب تک نہ ہونے کے بارے میں ایک بار پھر سوالات اٹھائے ہیں۔ سبل نے ایک انٹرویو میں کہا کہ کانگریس صدر سونیا گاندھی کی پارٹی کی اعلی قیادت سے ملاقات کو ایک ماہ سے زیادہ کا عرصہ ہوگیا ہے ، لیکن پارٹی کے اندر انتخابات کے لئے ابھی صورتحال کو واضح نہیں کیا گیا ہے۔ کپل سبل کانگریس پارٹی کے ان 23 رہنماؤں میں بھی شامل ہیں ، جنھوں نے سونیا گاندھی کو ایک خط لکھ کر پارٹی میں کئی بڑی تبدیلیوں کا مطالبہ کیا تھا۔
