کشن گنج تھانہ انچارج قتل: فرائض سے غفلت کی پاداش میں جان بچاکر بھاگنے والے ۷؍ پولیس اہلکار معطل

کشن گنج :(اردودنیا.اِن) بہار میں پورنیہ علاقہ کے پولیس انسپکٹر جنرل نے کشن گنج کے ٹاؤن تھانہ انچارج اشونی کمار کو مغربی بنگال میں چھاپہ ماری کے دوران پیٹ پیٹ کر قتل معاملے میں موقع سے جان بچا کر بھاگنے والے سات پولیس اہلکاروں کو معطل کر دیا ہے۔ ذرائع کے مطابق پورنیہ علاقہ کے پولیس انسپکٹر جنرل کی جانب سے جاری حکم نامہ میں کہا گیا ہے کہ لوٹی گئی موٹر سائیکل کی برآمدگی اور ملزم کی گرفتاری کے لیے کشن گنج شہر تھانہ انچارج اشونی کمار کی قیادت میں ایک ٹیم ہفتے کے روز علی الصبح سرحدی ریاست مغربی بنگال میں گوال پوکھر تھانہ حلقے کے پناتاپاڑہ گاؤں گئی تھی۔

اس ٹیم میں پولیس انسپکٹر منیش کمار کے ساتھ ہی سپاہی راجو سہنی، اکھلیشور تیواری، پرمود کمار پاسوان، اجول کمار پاسوان، سنیل چودھری اور سشیل کمار بھی شامل تھے۔ملزم کے رشتہ دار سمیت تقریباً 500 افراد نے چھاپہ مار ٹیم پر حملہ کر دیا۔

ہجوم نے پولیس انسپکٹر اشونی کمار کو پکڑ لیا اور انھیں پیٹ پیٹ کر قتل کر دیا۔ وہیںچھاپہ مار ٹیم میں شامل دیگر سات اراکین موقع سے جان بچا کر بھاگ گئے۔ اگر ان پولیس اہلکاروں نے اپنی ذمہ داری پر عمل در آمد عقلمندی سے کی ہوتی، تو ممکنہ طور پر یہ واقعہ نہیں ہوتا۔ اس واقعہ میں بادی النظر میںان سات پولیس اہلکاروں کی لاپرواہی سمجھ میں آتی ہے۔، اس لاپرواہی کے پاداش میں سپاہی راجو سہنی، اکھلیشور تیواری، پرمود کمار پاسوان، اجول کمار پاسوان، سنیل چودھری اور سشیل کمار کو فوری طور پر معطل کر دیاگیا ہے۔

قبل ازیں کشن گنج شہر تھانہ انچارج اشونی کمار کے قتل کے معاملے میں پولیس نے فوری کاروائی کرتے ہوئے ملزم کو گرفتار کر لیا ہے۔ گرفتار ملزموں میں فیروز عالم، اس کا بھائی ابوذر عالم اور اس کی ماں شہنور خاتون شامل ہیں۔ پولیس کے مطابق فیروز اس واقعہ کا کلیدی ملزم ہے۔