کورونا بحران میں اہم اقدام: ۳۱؍مئی تک تمام بین الاقوامی پروازوں پر پابندی عائد کردی گئی

نئی دہلی:(اردودنیا.اِن)اطلاع کے مطابق ڈائریکٹر جنرل برائے سیول ایوی ایشن یعنی ڈی جی سی اے نے حکم جاری کرکے کہا ہے کہ کورونا وبا کے بڑھتے کیسز کے پیش نظر 31 مئی تک تمام بین الاقوامی پروازوں پر پابندی عائد کر دی گئی ہے۔ واضح رہے پابندی کارگو آپریشن پر لاگو نہیں ہوگی،اس کے ساتھ یہ بھی کہا گیا ہے کہ کچھ بین الاقوامی روٹس پر متعلقہ اتھارٹی کی منظوری کے بعد پروازوں کو چلایا جا سکتا ہے۔

واضح ہو کہ گزشتہ سال بھی کرونا وبا کے آغاز کے بعد بین الاقوامی پروازوں کو بند کر دیا گیا تھا اور پھر دو ماہ بعد دھیرے دھیرے ان پروازوں کو بحال کیا گیا تھا۔ ابھی سیول ایوی ایشن صنعت میں تھوڑی حرکت آئی ہی تھی،لیکن اب اس پابندی کے بعد ایک مرتبہ پھر اس صنعت کو بھاری نقصان سے گزرنا پڑ سکتا ہے۔ یوں تو پوری دنیا میں جس طرح کورونا پھیلا ہوا ہے ،اس کی وجہ سے سیاحت کی صنعت پوری طرح متاثر ہوئی ہے، اور ان دونوں صنعتوں کے متأثرہونے کے ساتھ ساتھ ہوٹل صنعت بھی بری طرح متاثر ہوئی ہے۔

کورونا وبا کی وجہ سے ملک کے حالات بہت خراب ہیں اور چاروں جانب خوف ہی خوف ہے۔ جمعرات کو کورونا کے نئے معاملوں کی تعداد تین لاکھ چھیاسی ہزار سے زیادہ رہی ہے ، جب کہ مرنے والوں کی تعداد بھی تین ہزار پانچ سو سے زیادہ تھی۔