لڑکی کے انکار کرنے پر اہل خانہ کیخلاف داروغہ نے 8ایف آئی آ ر درج کرائی
لکھنؤ: (اردودنیا.اِن) جب محافظ ہی لیٹرا بن جائے ،تو انصاف کی توقع کس سے کی جائے ؟ کچھ ایسا ہی معاملہ اترپردیش کے ضلع بستی میں بھی سامنے آیا ہے۔ یہاں ایک عاشق مزاج داروغہ نے ایک لڑکی کا جینا محال کردیا ۔ الزام ہے کہ عاشق مزاج داروغہ لڑکی کو فحش پیغام اور فون کال کرتا تھا۔لڑکی نے جب اس کا نمبر بلاک کردیا ، تو داروغہ اس کے پیچھے پڑگیا۔ لڑکی کے ’نہ‘ کی وجہ سے اہل خانہ پر مصائب کے پہاڑ ٹوٹ پڑے۔
واضح ہو کہ ایک سال میں اس کے کنبے کے خلاف ایک کے بعد ایک 8 ایف آئی آر درج کی گئی۔ اس معاملے میں ریاستی خواتین کمیشن کی سختی اور محکمہ داخلہ کی تحقیقات کے بعد ملزم داروغہ کے علاوہ کوتوال کو بھی معطل کردیا گیا ہے۔
حکومت نے ہفتے کے روز ضلع کے کپتان کو بھی ہٹا دیا۔یہ سارا معاملہ سال گزشتہ کا ہے ، جب ملک میں کورونا کی وجہ سے لاک ڈاؤن چل رہا تھا۔ الزام یہ ہے کہ 31 مارچ 2020 کو لڑکی دادی کی دوائی لینے گھر سے نکلی۔ سانوپور چوکی پر تعینات داروغہ دیپک سنگھ نے اسے روکا اور کاغذات چیک کرنے کے بہانے اس کا موبائل نمبر لے لیا۔ اسی دن سے ملزم داروغہ نے اس کے نمبر پر فون کرنا شروع کردیا۔
سوشل میڈیا پر پیغامات بھیجنے کے ساتھ ہی اس سے فحش باتیں کرنا شروع کردیں۔ جب لڑکی نے انسپکٹر کا نمبر بلاک کیا تو اس نے دوسرے نمبر سے کال کرنا اور میسج کرنا شروع کردیا۔یہ الزام لگایا گیا ہے کہ 2 اپریل 2020 کو جب لڑکی ایک بار پھر دوا لینے نکلی تھی ، داروغہ دیپک سنگھ نے اسے روکا اور بات کرنے کی دھمکی دی۔ لیکن لڑکی نے اس کے نمبر کو بلاک کردیا۔
الزام یہ ہے کہ اس کے بعد پولیس نے اس کے بھائی کے خلاف قاتلانہ حملہ ، یرغمال اور پستول چھیننے کا مقدمہ درج کیا۔ لڑکی کے بھائی ، بہن اور دیگر بھی اس کیس میں ملوث تھے۔ یہ الزام ہے کہ ایک سال کے اندر اس کے کنبے کے ممبروں کے خلاف مجموعی طور پر 8 مقدمات درج ہوئے۔اہل خانہ کا کہنا ہے کہ ان کیسوں کی وجہ سے لڑکی کی شادی نہیں ہوپارہی ہے ، اور اس کی کزن کا رشتہ بھی ان ہی کیسوں کی وجہ سے ختم ہوگیا ۔
متاثرہ شخص نے اس سلسلے میں ضلع کے اعلی حکام سے بھی شکایت کی۔ لیکن اس کیس کورفع دفع کردیا گیا۔ آخر کار لڑکی نے خودکشی کی دھمکی دی ، تب ایس پی ہیمراج مینا کو تفتیش کے لئے اے ایس پی سطح کے افسر سے جانچ کرائی ۔ تفتیش کے دوران لڑکی کے الزامات جھوٹے نکلے ،تاہم داروغہ دیپک سنگھ کو لائن حاضر کردیا گیا ،فی الحال وہ کشی نگر میں تعینات ہے ۔
ایس پی نے کہا تھا کہ پوکربھٹوا گاؤں میں گذشتہ سال جون کے مہینے میں زمینی تنازعہ کا ایک واقعہ پیش آیا تھا۔ اس وقت وہاں کے لوگوں نے سرکاری کام میں رکاوٹ ڈالی تھی، اس وقت داروغہ دیپک سنگھ وہیں تھے ، انہیں اور ان کی ٹیم کو گاؤں کے لوگوں نے یرغمال بنا لیا تھا۔ جس کے بعد مقدمات درج کئے گئے۔
آخر متاثرہ لڑکی نے ریاستی خواتین کمیشن کی چیئرپرسن سے ملاقات کی۔ کمیشن نے پرنسپل سکریٹری ہوم سے رپورٹ طلب کرلی۔ محکمہ داخلہ نے تحقیقات اے ڈی جی کے حوالے کردی۔ ایڈیشنل ڈائریکٹر جنرل پولیس اکھل کمار کی ٹیم متاثرہ کے گاؤں پہنچی اور تفتیش کی۔ کمشنر انیل کمار ساگر ، آئی جی اے کے رائے ، ڈی ایم سومیا اگروال اور ایس پی سنت کبیر نگر نے متاثرہ کے ساتھ دونوں فریقین کے بیانات لئے۔
اس کے بعد کوتوالی کے انچارج انسپکٹر رام پال یادو ، موجودہ چوکی انچارج دیپک سنگھ کو معطل کردیا گیا۔ ایس پی ہیمراج مینا کا کو بھی اس معاملے میں مناسب کارروائی نہ کرنے پر ہٹا دیا گیا۔ ان کی جگہ ، آشیش سریواستو کو بستی کا نیا پولیس سپرنٹنڈنٹ بنا یا گیا ہے۔
