یوگی آدتیہ ناتھ کابینہ میں جلدتبدیلی ہوگی

لکھنؤ24جنوری(اردودنیا.اِن) اقتدارکے گلیاروں میں قیاس آرائی ہے کہ یوگی کابینہ میں جلد ہی ردوبدل کیا جاسکتا ہے۔ بی جے پی کے صدر جگت پرکاش نڈاکے دورے نے بحث کو تیز کردیا ہے جس کی وجہ سے متعدد وزرا گھبرا گئے ہیں۔ اس تبدیلی کو تین سطحی پنچایت انتخابات سے قبل مشن 2022 کی تیاریوں کے سلسلے میں دیکھا جاسکتا ہے۔

یہ خیال کیا جارہا ہے کہ آدھے درجن کے قریب وزیرمتاثر ہوں گے۔کچھ نئے چہروں کی انٹری بھی ہوسکتی ہے۔پارٹی میں قیاس آرائیاں کی جارہی ہیں کہ انتخابات کے لیے تیار کی جارہی کابینہ میں ذات پات اور علاقائی مساوات پرتوجہ دی جائے گی۔ خواتین کی نمائندگی بڑھانے کے علاوہ نوجوانوں کو بھی موقع ملے گا۔اضلاع میں انچارج کی حیثیت سے مطلوبہ کام نہیں کرنے والے بھی ریڈارپرہیں۔

قیادت کا خیال ہے کہ اگر تنازعات میں گھرے وزیروں کو نہ ہٹایا گیا تو پارٹی کو نقصان ہوسکتا ہے۔ اسی طرح ریاستی کابینہ میں نصف درجن تقرریوں کی گنجائش ہے۔ کابینہ کے دو وزراء چیتن چوہان اور کمال رانی ورون کی جگہ بھی ہے۔

ذرائع نے انکشاف کیا ہے کہ وزیراعلیٰ یوگی آدتیہ ناتھ نے حال ہی میں دہلی کے دورے کے دوران اعلیٰ قائدین سے کابینہ میں ردوبدل کا گرین سگنل لیا تھا۔ یہاں جس انداز میں بی جے پی صدر نڈا نے وزراء کو عملی انداز میں مثبت تبدیلی لانے کا مشورہ دیا ، اس نے کابینہ میں ردوبدل کے امکان پر بھی زور دیاہے۔