کینیڈا میں تربیتی پرواز کے دوران طیارہ حادثہ، تمل ناڈو اور پڈوچیری کے 2 بھارتی طلبہ جاں بحق

کینیڈا، 21 ستمبر (اردو دنیا نیوز/ایجنسیز)ینیڈا میں پائلٹ بننے کی تربیت حاصل کرنے والے تمل ناڈو اور پڈوچیری سے تعلق رکھنے والے دو بھارتی طلبہ طیارہ حادثے میں جاں بحق ہوگئے۔ وینکوور میں بھارتی قونصل خانے نے منوج شیوکمار اور سریسرن تھروگناناسامبندھم کی موت کی تصدیق کرتے ہوئے ان کے اہل خانہ سے تعزیت کی ہے۔

قونصل خانے نے ایکس پر جاری بیان میں کہا کہ متاثرہ خاندانوں کو ہر ممکن قونصلر معاونت فراہم کی جائے گی، جبکہ میتوں کو بھارت واپس لانے کے عمل میں بھی مدد کی جائے گی۔

دوسری جانب کینیڈین میڈیا ادارے CBC نے سسکیچیوان کے علاقے کِسبے کے قریب ایک Cessna 172 طیارے کے حادثے میں دو افراد کی ہلاکت کی اطلاع دی ہے۔ تاہم فوری طور پر یہ آزادانہ طور پر تصدیق نہیں ہوسکی کہ یہ حادثہ انہی دونوں بھارتی طلبہ سے متعلق ہے۔

CBC کے مطابق Manitoba کے فلائٹ اسکول Harv’s Air کا طیارہ جمعہ کی صبح ریجائنا سے اسٹین باخ جاتے ہوئے حادثے کا شکار ہوا۔ دونوں افراد لائسنس یافتہ پائلٹ تھے اور کمرشل پائلٹ لائسنس کے لیے پرواز کے اوقات مکمل کرنے کی غرض سے طیارہ کرائے پر لیا گیا تھا۔

طیارہ مقررہ منزل پر نہ پہنچا تو اسے صبح تقریباً 10 بج کر 30 منٹ پر اوورڈیو رپورٹ کیا گیا۔ سرچ اینڈ ریسکیو ٹیموں نے تقریباً شام 6 بجے ملبہ تلاش کیا، جہاں دونوں افراد مردہ پائے گئے۔

Joint Rescue Coordination Centre کے مطابق 435 اسکواڈرن کے CC-138 Hercules طیارے نے حادثے کا مقام تلاش کیا، جس کے بعد ریسکیو اہلکاروں کو پیراشوٹ کے ذریعے وہاں پہنچایا گیا۔ بعد ازاں معاملہ RCMP کے حوالے کردیا گیا۔

CBC کے مطابق جنوری 2025 کے بعد Harv’s Air سے متعلق یہ تیسرا رپورٹ شدہ حادثہ ہے۔ حالیہ حادثے کی وجہ تاحال معلوم نہیں ہوسکی اور کینیڈین حکام تحقیقات کر رہے ہیں۔