بین الاقوامی خبریں
’ہم نے تاریخ رقم کرلی، اہم ریاستوں میں کامیابی کے بعد ٹرمپ کا فتح کا دعویٰ
ہم نے آج تاریخ رقم کی ہے۔ ملک کے زخم بھریں گے اور اسے مشکلات سے نکالیں گے۔
واشنگٹن، 6نومبر (ایجنسیہز) امریکی ریپبلکن پارٹی کے صدارتی امیدوار ڈونلڈ ٹرمپ نے اہم ریاستوں میں برتری حاصل کرنے کے بعد کارکنان سے خطاب میں اپنی ’فتح‘ کا دعویٰ کیا ہے۔امریکی ریاست فلوریڈا کے ویسٹ پام بیچ میں کارکنان سے خطاب کرتے ہوئے ڈونلڈ ٹرمپ نے کہا کہ ’ہم نے آج تاریخ رقم کی ہے۔ ملک کے زخم بھریں گے اور اسے مشکلات سے نکالیں گے۔ سرحدوں کو محفوظ بنائیں گے اور دیگر مسائل کو حل کریں گے۔اپنی تقریر کے دوران ڈونلڈ ٹرمپ نے اپنی حریف کملا ہیرس کے حوالے سے ایک لفظ بھی نہیں کہا اور اپنی جیت کے بارے میں ہی گفتگو کرتے رہے۔
انہوں نے امریکی عوام کا شکریہ ادا کرتے ہوئے کہا کہ یہ شاندار فتح ہے، امریکہ میں سنہری دور کا آغاز ہونے جا رہا ہے۔ڈونلڈ ٹرمپ نے دعویٰ کیا کہ وہ 315 الیکٹورل ووٹ حاصل کر لیں گے۔لوگوں نے ہمیں فقید المثال اور انتہائی طاقتور مینڈیٹ دیا ہے۔ ہم نے سینیٹ واپس لے لیا ہے اور لگتا ہے کہ ایوانِ نمائندگان کا کنٹرول بھی ہمارے ہی پاس رہے گا۔ڈونلڈ ٹرمپ نے کہا کہ وہ کہتے ہیں کہ یہ جنگ شروع کرے گا لیکن میں کوئی جنگ شروع نہیں کروں گا بلکہ جنگوں کو ختم کروں گا۔
انہوں نے مزید کہا کہ ہم نے تمام رکاوٹوں کا مقابلہ کیا، ایسا اس ملک نے پہلے کبھی نہیں دیکھا۔ امریکہ اب نئی بلندیوں کو چھُوئے گا۔ڈونلڈ ٹرمپ کے ساتھ سٹیج پر ان کی اہلیہ کے علاوہ خاندان کے کئی دوسرے افراد بھی موجود تھے۔ اس طرح نائب صدر کے اُمیدوار جے ڈی وینس اور ہاؤس اسپیکر مائیک جانسن بھی موجود تھے۔جے ڈی وینس نے اس موقع پر کہا کہ ہم ڈونلڈ ٹرمپ کی سربراہی میں ملک کو خوشحالی کی راہ پر گامزن کریں گے۔
امریکی میڈیا کے مطابق ڈونلڈ ٹرمپ 266 ووٹوں کے ساتھ آگے ہیں جبکہ کملا ہیرس کو اب تک 205 ووٹ ملے ہیں۔امریکہ کی متعدد ریاستوں میں ووٹوں کی گنتی کے بعد ابتدائی نتائج موصول ہو گئے ہیں تاہم، کچھ اہم ریاستوں ایریزونا، مشی گن، وسکونسن اور نیواڈا میں ووٹوں کی گنتی جاری ہے۔امریکی میڈیا کی پروجیکشن کے مطابق پینسلوانیا، جارجیا، شمالی کیرولائنا، فلوریڈا، ٹیکساس، مونٹانا، انڈیانا اور کینٹکی سمیت کئی ریاستوں میں ڈونلڈ ٹرمپ کو برتری حاصل ہے۔
نیویارک، کیلیفورنیا، ورجینیا، میری لینڈ اور میساچوسیٹس سمیت متعدد ریاستوں میں کملا ہیرس آگے ہیں۔صدر کے عہدے کے لیے مدّمقابل امیدوار کو کم سے کم 270 الیکٹورل ووٹ حاصل کرنا ہوں گے۔نائب صدر کملا ہیرس کی انتخابی مہم کے معاون چیئرمین مطابق ’کملا ہیرس آج رات کارکنوں سے خطاب نہیں کریں گی تاہم، توقع ہے کہ وہ جمعرات کو خطاب کریں گے۔
