نئی دہلی، 26نومبر ( ایجنسیز) مہاراشٹر اور جھارکھنڈ اسمبلی انتخابات کے بعد اب راجیہ سبھا کے ضمنی انتخابات کا اعلان کیا گیا ہے۔ الیکشن کمیشن آف انڈیا نے راجیہ سبھا کی چھ خالی نشستوں کے لیے نوٹیفکیشن جاری کر دیا ہے۔ ان نشستوں پر انتخابات 20 دسمبر کو ہوں گے۔ نتائج کا اعلان اسی دن کیا جائے گا۔جن سیٹوں پر انتخابات ہونے جا رہے ہیں ان میں سے تین سیٹیں آندھرا پردیش کی ہیں۔ اس کے علاوہ مغربی بنگال، ہریانہ اور اڈیشہ میں ایک ایک سیٹ پر انتخابات ہو رہے ہیں۔
تمام نشستیں موجودہ ارکان اسمبلی کے استعفے کے بعد خالی ہوگئیں۔الیکشن کمیشن کے مطابق ضمنی انتخاب سے متعلق نوٹیفکیشن 3 دسمبر کو جاری کیا جائے گا۔ نامزدگی کی آخری تاریخ 10 دسمبر مقرر کی گئی ہے۔ کاغذات نامزدگی کی جانچ پڑتال 11 دسمبر کو ہوگی۔ امیدوار 13 دسمبر تک کاغذات نامزدگی واپس لے سکتے ہیں۔انتخابات 20 دسمبر کو ہوں گے اور اسی دن نتائج جاری کیے جائیں گے۔
الیکشن کمیشن کو ان سیٹوں پر 24 دسمبر سے پہلے انتخابات کروانے ہیں۔ اس سے قبل مہاراشٹر اور جھارکھنڈ میں اسمبلی انتخابات ہوئے تھے۔ مہاراشٹر میں 20 نومبر کو ووٹنگ ہوئی اور جھارکھنڈ میں دو مرحلوں (13 اور 20 نومبر) میں ووٹنگ ہوئی۔ان کے نتائج 23 نومبر کو آئے۔ مہاراشٹر میں، بی جے پی، شیوسینا اور این سی پی کے اتحاد نے بھاری اکثریت سے کامیابی حاصل کی تھی۔ اس کے ساتھ ہی جھارکھنڈ میں جے ایم ایم اور دیگر جماعتوں کے اپوزیشن اتحاد انڈیا نے اقتدار برقرار رکھا۔
