جلد کا خشک ہونا یا جسم پر خشکی کے اثرات موسم سرما کا ایک عام مسئلہ ہے۔ لیکن کبھی کبھی خشک جلد جسم میں موجود کسی بڑی بیماری کی طرف بھی اشارہ کرتی ہے۔ماحول کے اثرات، تیز گرم پانی سے نہانا، جلد سے نمی کا کم یا غائب ہوجانا، آگ کے پاس زیادہ دیر بیٹھنا اور تیز کیمیائی صابن کا استعمال اس کی بڑی وجوہات ہیں۔

خشکی کی علامات

درج ذیل علامات خشک جلد کی طرف اشارہ کرتی ہیں۔

جلد پر سختی یا کھچاؤ کی کیفیت

روکھاپن اور بے جان جلد

خارش کا احساس

جلد پر سے چھلکے اترنا

جلد کا پھٹنا

جلد کی سیاہی مائل یا سرخ رنگت

جلدپر واضح دراڑیں پڑنا

بیماریاں

چہرے پر سفید دھبے پڑنا، ٹانگوں پر شدید خارش اور جسم پر سرخی مائل دھبے خشک جلد کے باعث ہونے والی عام بیماریاں ہیں تاہم ذیا بیطس بھی ایک ایسی بیماری ہے جس کے باعث جلد خشک ہو سکتی ہے۔ جلد پر خشکی کے باعث ہونے والی بیماریوں میں ایک اہم بیماری چنبل بھی ہے۔ چنبل کو خارش سے تشبیہ بھی دی جا سکتی ہے مگر اس کی کیفیات عام خارش سے بڑھ کر ہیں۔ اس بیماری میں جلد اپنی بیرونی تہہ کو بہت تیزی سے تبدیل کرتی ہے۔ اس صورت حال میں جلد سرخ ہو جاتی ہے اور پپڑی بن کر اترنے لگتی ہے۔ اس وجہ سے بہت حساس ہو جاتی ہے اور روز مرہ کے کام بھی دوبھر ہو جاتے ہیں۔ جلد کی ایک اور بیماری کو ایگزیما بھی کہا جاتا ہے۔ اس بیماری میں جلد پر خارش کے بعد سرخی آجاتی ہے۔

جو کئی حالتوں میں بہنے والے زخم میں تبدیل ہو سکتی ہے۔ جلد کی زیادہ خراب حالت سردیوں میں ہوتی ہے جب ہوا میں نمی کی مقدار کم ہو جاتی ہے۔ ایگزیما شدید حالت میں سانس کی تکلیف اور جلد کے کینسر کا باعث بھی بن سکتی ہے۔ جس کا وقت پر علاج بہت ضروری ہے۔
گھریلو اقدامات

جلد کو خشکی سے بچانے کے لیے اگر درج ذیل اقدمات کیے جائیں تو بڑی بیماریوں سے بچا جا سکتا ہے۔

ناریل کا تیل: ناریل کا تیل جذب ہونے کی صلاحیت رکھتا ہے۔ قدرتی ہونے کی وجہ سے یہ جلد کی نمی کو محفوظ رکھتا ہے اور جلد کو خشکی سے بچاتا ہے۔ سردیوں کے موسم میں جب نمی کی مقدار خاصی کم ہوتی ہے اس تیل کے استعمال سے جلد کو نرم رکھا جا سکتا ہے۔

پیٹرولیم جیلی یا خوردنی تیل: ویزلین کا استعمال زیادہ عمر کے لوگوں میں اچھا اثر دکھاتا ہے لیکن ویزلین کے استعمال کے بعد ایک چکنی تہہ بن جاتی ہے جو بیشتر لوگ ناپسند کرتے ہیں تاہم یہ ہونٹوں اور ہاتھ پیروں کی جلد کو نارمل رکھنے کے لیے بہتر ین ہے۔

دستانے: موسم سرما میں گھر سے باہر نکلتے ہوئے اگر دستانوں کا استعمال کیا جائے تو ہاتھوں کی نمی کو محفوظ رکھا جا سکتا ہے۔ ہاتھوں پر لوشن کا استعمال اور دستانے پہننے سے ہاتھوں کی جلد کے سیاہ اور خراب ہونے کے امکانات بہت کم ہوجاتے ہیں۔

پانی کا درجہ حرارت: نہانے کے پانی کا درجہ حرارت معتدل ہونا چاہئے۔ بہت تیز گرم پانی سے غسل کرنے کی وجہ سے بھی جلد خشک ہو جاتی ہے اور خارش کا امکان بھی بڑھ جاتا ہے۔
اونی کپڑے: بعض لوگوں کی جلد بہت حساس ہوتی ہے اس وجہ سے اونی یا ریشمی کپڑے پہننے سے انہیں خارش اور چبھن کا احساس ہوتا ہے۔ بہتر یہ ہے کہ ایسے کپڑوں کو براہ راست جلد کے ساتھ نہ لگنے دیا جائے اور سوتی کپڑوں کا استعمال کیا جائے۔

ہومیڈیفائر: سرد ممالک میں اس آلے کا استعمال گھروں کے درجہ حرارت اور نمی کے تناسب کو برقرار رکھنے کے لئے کیا جاتا ہے۔ ہارورڈ میڈیکل اسکول میں بھی اس آلے کے استعمال پر زور دیا گیا ہے
اینٹی آکسیڈینٹ اور اومیگا تھری: بہت سی غذاؤں میں اینٹی آکسیڈینٹ قدرتی طور پر پائے جاتے ہیں۔ ان غذاؤں میں گاجر، ٹماٹر، لوبیا، مٹر، دالیں اور جامن وغیرہ شامل ہیں۔ یہ غذائیں جسم میں نمی کی مقدار کو برقرار رکھنے اور جلد کو بہتر بنانے میں مددگار ہوتے ہیں۔ اسی طرح اومیگا تھری بھی سویا بین، اخروٹ اور سالمن مچھلی میں قدرتی طور پر پایاجاتا ہے۔ ایسی غذاؤں کے استعمال سے جلد کو بیماریوں سے بچایا جا سکتا ہے۔

دلیہ کا غسل: زمانہ قدیم سے جلد کی خشکی اور خارش سے بچاؤ کے لیے دلیہ کے غسل کا اہتمام کیا جاتا ہے۔ آج بھی اس کا استعمال جلد کی بیماریوں سے بچنے کے لیے قابل عمل ہے۔ اس کا طریقہ یہ ہے کہ اناج کو پیس لیا جاتا ہے او ر اسے ابال کر اس پانی سے غسل کیا جاتا ہے۔اس سے نہ صرف جلد کی نمی بحال ہو جاتی ہے بلکہ جلد کے امراض سے بھی نجات ملتی ہے۔

جلد کی خشکی اور خارش سے بچنے کیلئے موسم سرما کے آوائل میں ہی حفاظتی اقدامات کر لینے چاہئیں۔ پانی اور دوسرے رس دار پھلوں کا استعمال زیادہ سے زیادہ کریں۔ گھر سے باہر نکلنے سے پہلے لوشن کا استعمال کریں۔ تیز گرم پانی سے مت نہائیں اور دستانوں کا استعمال کریں۔ان تدابیر پر عمل کرنے سے جلدی امراض سے بڑی حد تک محفوظ رہا جاسکتا ہے۔٭

سرکے کی چائے گرم پانی سے بھرے ایک گلاس میں سیب کے سرکے کی ایک چمچ مقدار کی آمیزش کافی ہوتی ہے۔ اس آمیزے کو منہ میں بھر کر غرارہ کرنے کے بعد حلق سے نیچے اتار لیں۔ ایک گھنٹے کے بعد دوسری بار بھی اسی طرح غرارہ کیاجائے۔ جب حلق کی خراش کچھ کم محسوس ہو تو وقفہ دو گھنٹے تک بڑھا دیں۔