اِن 5 ریاستوں میں بارش کا امکان،محکمہ موسمیات نے جاری کیا الرٹ

نئی دہلی،14فروری:(اردودنیا.اِن/ایجنسیز)آئندہ 24 گھنٹوں کے دوران میدانی علاقوں میں شمال مغربی سمت سے تیز ہوائیں چلیں گی۔ اروناچل پردیش میں ہلکی سے درمیانی بارش اور برف باری ہوسکتی ہے۔ سکم، آسام، میگھالیہ اور ناگالینڈ میں ہلکی بارش متوقع ہے۔ اگلے 2 دنوں کے دوران شمال مغربی ہندوستان اور اتر پردیش میں کم سے کم درجہ حرارت مزید گرے گا۔دہلی میں دھوپ ہے۔ جمعہ کو یہاں کم سے کم درجہ حرارت 10.7 ڈگری سیلسیس ریکارڈ کیا گیا۔ یہ اس موسم کے عام درجہ حرارت سے 0.5 ڈگری سیلسیس کم ہے۔ محکمہ موسمیات نے شمال مغرب سے ہوائیں چلنے کی پیش گوئی کی ہے۔ ہفتہ کو بھی موسم ایسا ہی رہنے کی توقع ہے۔ 15 فروری کو دارالحکومت کا زیادہ سے زیادہ اور کم سے کم درجہ حرارت بالترتیب 26-28 اور 10-12 ڈگری سیلسیس کے درمیان رہ سکتا ہے۔

ہوا کی رفتار 10-15 کلومیٹر فی گھنٹہ ہو سکتی ہے۔جھارکھنڈ میں اگلے 4 دنوں تک موسم میں کوئی بڑی تبدیلی نہیں آئے گی۔ تاہم ہوا کے باعث لوگ صبح و شام سردی محسوس کر رہے ہیں۔ اگلے 24 گھنٹوں کے دوران درجہ حرارت میں 2 سے 3 ڈگری تک کمی آسکتی ہے۔ رانچی میں واقع محکمہ موسمیات نے کہا کہ 17 سے 19 فروری تک جزوی طور پر ابر آلود موسم دیکھا جا سکتا ہے۔

جھارکھنڈ کے کچھ اضلاع میں 20 اور 21 فروری کو بھی بارش کا امکان ہے۔بہار میں ویسٹرن ڈسٹربنس سرگرم ہے۔ جس کی وجہ سے سردی کا اثر بڑھتا دکھائی دے رہا ہے۔محکمہ موسمیات کے مطابق آئندہ دو روز تک کم سے کم درجہ حرارت میں دو سے تین ڈگری تک کمی ہوسکتی ہے۔ تاہم زیادہ سے زیادہ درجہ حرارت میں کسی خاص تبدیلی کا کوئی امکان نہیں ہے۔ ماہرین موسمیات کے مطابق تیز مغربی ہواؤں کے باعث رات کا درجہ حرارت گر رہا ہے۔ جس کی وجہ سے لوگ سردی محسوس کر رہے ہیں۔

ویسٹرن ڈسٹربنس کا اثر راجستھان میں بھی نظر آرہا ہے۔ اس کے اثر کے باعث 15 سے 17 فروری تک موسم جزوی طور پر ابر آلود رہنے کا امکان ہے۔ 16 فروری کو ریاست کے شمالی حصوں میں کچھ مقامات پر ہلکی بوندا باندی کا امکان ہے۔اتر پردیش میں تیز ہوائیں 15 فروری سے رکنے کا امکان ہے۔ 19 فروری سے ریاست میں موسم ایک بار پھر بدل سکتا ہے۔ یہاں بارش کا امکان ہے۔ محکمہ موسمیات کا کہنا ہے کہ 14 فروری کو موسم صاف رہے گا۔ 16 سے 18 فروری کے درمیان ہلکی دھند پڑنے کا امکان ہے۔ اس کے ساتھ ہی 19 فروری کو مغربی حصے میں ہلکی بارش ہو سکتی ہے۔