دسویں جماعت کی طالبہ نے بچی کو جنم دیا۔

اوڈیشہ/ملکانگیری :(اردودنیا.اِن/ایجنسیز)اڈیشہ کے ملکانگیری ضلع سے ایک چونکا دینے والا معاملہ سامنے آیا ہے۔ یہاں ایک سرکاری ریزیڈینشل اسکول کے ہاسٹل میں دسویں جماعت کی طالبہ نے لڑکی کو جنم دیا۔ اس واقعہ کے سامنے آنے کے بعد انتظامیہ میں کھلبلی مچ گئی۔ اس کی اطلاع فوری طور پر مقامی پولیس کو دی گئی۔ اب اسکول انتظامیہ کی لاپرواہی پر کئی سوالات اٹھ رہے ہیں۔

پولیس کا کہنا ہے کہ پیر کو طالبہ بورڈ کا امتحان دینے کے بعد ہاسٹل واپس آئی جہاں اسے اچانک درد کی تکلیف ہوئی اور اس نے بچی کو جنم دیا۔ اسکول پرنسپل کا کہنا تھا کہ ہاسٹل میں مردوں کا داخلہ ممنوع ہے، اس لیے یہ سمجھ سے بالاتر ہے کہ طالبہ حاملہ کیسے ہوئی۔ انہوں نے یہ بھی اعتراف کیا کہ ہیلتھ ورکرز نے طالبات کو ہفتہ وار چیک کرنا تھا لیکن یہ معاملہ ان کی لاپرواہی کو ظاہر کرتا ہے۔

طالبہ اور نوزائیدہ کو پہلے چترکونڈہ سب ڈسٹرکٹ اسپتال اور پھر ملکانگیری ضلع اسپتال میں داخل کرایا گیا، جہاں دونوں کی حالت مستحکم بتائی جاتی ہے۔ طالبہ کے والدین نے اسکول انتظامیہ سے سوال کیا کہ ان کی بیٹی کے حمل کو پورے 9 ماہ تک کیوں چھپایا گیا۔
پولیس نے مقدمہ درج کر کے تفتیش شروع کر دی۔

اس واقعہ پر ڈسٹرکٹ ویلفیئر آفیسر سرینواس اچاریہ نے کہا کہ اس بات کا امکان ہے کہ طالبہ تعطیلات کے دوران حاملہ ہوگئی ہو۔ انہوں نے یہ بھی کہا کہ اس معاملے کی محکمانہ انکوائری شروع کر دی گئی ہے اور ایک مشتبہ شخص کو حراست میں لے لیا گیا ہے۔ پولیس کا کہنا ہے کہ واقعے کا جلد پتہ چل جائے گا۔