مرنے والے کے نام وارنٹ گرفتاری جاری، عدالت میں طلبی – پولیس کا گھر پر چھاپہ

کانپور:(اردودنیا.اِن/ایجنسیز)اتر پردیش کے کانپور میں ایک حیران کن واقعہ سامنے آیا ہے، جہاں ایک شخص کی وفات کے تقریباً 10 سال بعد اس کے نام گرفتاری کا وارنٹ جاری کر دیا گیا۔ گھر والوں کے مطابق پولیس انہیں عدالت میں پیشی کے لیے وارننگ دے رہی ہے، جبکہ وہ یہ ثابت کرنے کے لیے پریشان ہیں کہ ان کا عزیز برسوں پہلے ہی دنیا سے رخصت ہو چکا ہے۔

10 سال پہلے وفات، مگر پولیس تلاش میں مصروف

یہ معاملہ کانپور کے ہربنش محلہ کے رہائشی ونود ڈکشٹ کے بھائی درگیش ڈکشٹ کا ہے، جو زیادہ تر وجے نگر کالونی میں اپنے رشتہ دار کے ساتھ رہتے تھے۔ سال 2009 میں درگیش پر کچھ مقامی نوجوانوں سے جھگڑے کے بعد مقدمہ درج کیا گیا تھا، جس میں حملہ، دھمکی سمیت مختلف دفعات شامل تھیں۔ تاہم، 2015 میں شراب نوشی کے باعث جگر کی خرابی کے سبب اس کی موت اسپتال میں ہو گئی۔ چونکہ وہ اکیلا رہتا تھا، اس لیے اہلِ خانہ نے اس وقت اس کا ڈیتھ سرٹیفکیٹ بنوانے کی ضرورت محسوس نہیں کی۔

پولیس کی چھاپہ ماری، عدالت میں طلبی

چند دن پہلے پولیس درگیش کو تلاش کرتے ہوئے اس کے رشتہ دار کے گھر پہنچی۔ جب انہیں بتایا گیا کہ وہ 10 سال قبل انتقال کر چکا ہے، تو پولیس نے اس کا ڈیتھ سرٹیفکیٹ مانگا، جو لواحقین کے پاس موجود نہیں تھا۔ اس کے بعد پولیس نے درگیش کے نام گرفتاری وارنٹ حوالے کر دیا، جس میں اسے 19 مارچ کو عدالت میں طلب کیا گیا ہے۔

خاندان کی پریشانی – مرنے والا عدالت میں کیسے جائے؟

درگیش کے بھائی ونود ڈکشٹ کا کہنا ہے کہ وہ اب شدید ذہنی دباؤ کا شکار ہیں۔ ان کے پاس صرف شمشان گھاٹ کی رسید موجود ہے، مگر پولیس اسے تسلیم کرنے سے انکاری ہے۔ اہلِ خانہ کا سوال ہے کہ جب درگیش دنیا میں نہیں رہا تو وہ عدالت میں پیش کیسے ہو سکتا ہے؟

پولیس کی جانب سے مسلسل دباؤ کے باعث درگیش کے گھر والے اب کسی بھی ممکنہ قانونی کارروائی سے بچنے کے لیے اس کا ڈیتھ سرٹیفکیٹ حاصل کرنے کی کوشش کر رہے ہیں، تاکہ یہ ثابت کیا جا سکے کہ جس شخص کا وارنٹ جاری ہوا ہے، وہ برسوں پہلے ہی اس دنیا سے جا چکا ہے۔