مدھیہ پردیش:شوہر نے انسٹاگرام پر لائیو آکر خودکشی کر لی، بیوی 44 منٹ تک خاموش تماشائی بنی رہی، بیوی اور ساس گرفتار

ریوا :(اردودنیا.اِن/ایجنسیز)مدھیہ پردیش کے ریوا ضلع میں ایک اور دل دہلا دینے والا واقعہ سامنے آیا، جہاں ایک 26 سالہ نوجوان نے انسٹاگرام پر لائیو آ کر خودکشی کر لی۔ افسوسناک بات یہ ہے کہ اس کی بیوی بھی لائیو موجود رہی اور 44 منٹ تک شوہر کی موت کا تماشہ دیکھتی رہی، مگر اس نے ایک لفظ بھی نہ کہا۔

یہ واقعہ سرمور پولیس اسٹیشن کے تحت مہری گاؤں میں پیش آیا۔شیو پرکاش تریپاٹھی کی دو سال قبل پریا شرما سے شادی ہوئی تھی۔ ابتدائی دنوں میں سب کچھ ٹھیک چل رہا تھا، لیکن کچھ مہینوں بعد شیو پرکاش کو معلوم ہوا کہ اس کی بیوی کسی اور سے خفیہ طور پر بات چیت کر رہی ہے۔ اس نے اپنی شادی بچانے کے لیے یہ بات کسی کو نہ بتائی اور حالات کو بہتر بنانے کی کوشش کرتا رہا۔

شادی کے بعد بگڑتے حالات

شیو پرکاش نے بار بار اسے منانے کی کوشش کی اور سسرال کے چکر لگاتا رہا، مگر پریا نے واپس آنے سے انکار کر دیا۔ اہل خانہ کا الزام ہے کہ اس دوران پریا نے اپنے شوہر کے ساتھ بدسلوکی کی اور اسے تشدد کا نشانہ بھی بنایا۔

اسی دوران، شیو پرکاش ایک حادثے کا شکار ہو گیا، جس کی وجہ سے وہ بیساکھیوں پر آ گیا۔ اسی دوران، بیوی پریا شرما اپنا نوزائیدہ بچہ لے کر شوہر کو بے سہارا چھوڑ کر اپنے والدین کے گھر چلی گئی۔  شیو پرکاش بار بار اپنی بیوی کو منانے سسرال جاتا رہا، مگر وہ واپس نہ آئی۔ اہل خانہ کا الزام ہے کہ بیوی کسی اور کے عشق میں اندھی ہو چکی تھی اور اپنے عاشق کے ساتھ مل کر شیو پرکاش کو زدوکوب بھی کیا۔

انسٹاگرام پر لائیو آ کر خودکشی

جس دن یہ واقعہ پیش آیا، شیو پرکاش اپنی بیوی کو منانے کے لیے دوبارہ سسرال گیا، مگر وہاں مبینہ طور پر اسے بےعزت کیا گیا اور مارا پیٹا گیا۔ دل برداشتہ ہو کر وہ اپنے گھر واپس آیا، کمرے میں خود کو بند کر لیا اور انسٹاگرام پر لائیو ویڈیو شروع کر دی۔ کچھ دیر بعد، اس نے خود کو پھانسی لگا لی۔ حیران کن طور پر، اس کی بیوی 44 منٹ تک یہ منظر دیکھتی رہی، مگر کسی کو اطلاع نہ دی۔

پولیس کی کارروائی

جب گھر والوں کو اس واقعے کا علم ہوا تو انہوں نے ویڈیو دیکھ کر فوراً پولیس کو اطلاع دی۔ سب ڈویژنل پولیس آفیسر امیش پرجاپتی کے مطابق، تحقیقات میں پریا شرما کے مبینہ غیر ازدواجی تعلقات کے شواہد بھی ملے ہیں۔ پولیس کا ماننا ہے کہ ازدواجی تنازعات اس خودکشی کی بڑی وجہ بنے۔

پولیس نے بیوی پریا شرما اور اس کی ماں کو گرفتار کر کے جیل بھیج دیا ہے، جبکہ شیو پرکاش کے فون اور سوشل میڈیا اکاؤنٹس کو مزید ثبوت اکٹھے کرنے کے لیے ضبط کر لیا گیا ہے۔