کتے کے کاٹنے سے گائے کو ریبیز، دودھ پینے سے خاتون کی موت؛ یوپی میں چونکا دینے والا واقعہ

نئی دہلی :(اردودنیا.اِن/ایجنسیز)گریٹر نوئیڈا کے جیور علاقے کے تھورا گاؤں سے ایک حیران کن معاملہ سامنے آیا ہے، جہاں 40 سالہ خاتون ریبیز کی وجہ سے جاں بحق ہو گئی۔ اطلاعات کے مطابق، خاتون نے اس گائے کا دودھ پیا تھا جسے ایک پاگل کتے نے کاٹ لیا تھا۔ بعد میں، گائے میں ریبیز کی تصدیق ہوئی۔ دیگر اہل خانہ نے ریبیز کا ویکسین لگوا لیا تھا، لیکن متوفیہ سیما نے ویکسین نہیں لگوائی تھی۔

ریبیز کی تصدیق کے بعد سیما کی طبیعت بگڑ گئی

ذرائع کے مطابق، متوفیہ سیما اپنے اہل خانہ کے ساتھ تھورا گاؤں میں رہتی تھی۔ گاؤں میں ایک گائے نے بچھڑے کو جنم دیا تھا، جسے ایک پاگل کتے نے کاٹ لیا تھا۔ سیما نے اس گائے کا دودھ پیا، اور کچھ دنوں بعد گائے میں ریبیز کی علامات ظاہر ہوئیں۔ جب جانچ کی گئی تو ریبیز کی تصدیق ہوئی۔

منگل کی رات سیما کو اچانک پانی اور روشنی سے خوف محسوس ہونے لگا اور قے کرنا شروع کر دی۔  اہل خانہ اسے جیوَر کمیونٹی ہیلتھ سینٹر (CHC) لے گئے، جہاں سے اسے سیکٹر 39 ڈسٹرکٹ اسپتال ریفر کیا گیا۔ وہاں سے صفدرجنگ اسپتال، دہلی بھیج دیا گیا، لیکن رات بھر بھٹکنے کے بعد بھی مناسب علاج نہ مل سکا۔ بدھ کی صبح مجبور ہو کر اہل خانہ اسے واپس گھر لے آئے، جہاں جمعرات کی صبح سیما کی موت ہوگئی۔

کیا دودھ پینے سے ریبیز ہوسکتا ہے؟ ماہرین کا ردعمل

ماہرین صحت کے مطابق ریبیز کا وائرس عام طور پر لعاب دہن کے ذریعے پھیلتا ہے اور ہاضمے کے عمل میں زندہ نہیں رہتا، کیونکہ معدے کا تیزاب اسے ختم کر دیتا ہے۔ تاہم، اگر دودھ کو اُبالا نہ جائے اور پینے والے کے منہ میں زخم موجود ہو تو وائرس جسم میں داخل ہوسکتا ہے۔

🌍 تازہ ترین خبریں، اپڈیٹس اور دلچسپ معلومات ایک کلک پر!  🔗 ابھی جوائین کریں: اردو دنیا نیوز واٹس ایپ گروپ