جگتیال :پولاس میں مذہبی تناؤ، مسجد کے سامنے اچانک مندر کی تعمیر پر ہنگامہ
مسجد کی زمین پر اچانک مندر کی تعمیر پر ہنگامہ
جگتیال :(اردودنیا.اِن/ایجنسیز)جگتیال ضلع کے موضع پولاس میں اتوار کی صبح اس وقت شدید کشیدگی پیدا ہوگئی جب یہ انکشاف ہوا کہ راتوں رات مسجد سے متصل زمین پر اچانک ایک مندر کی تعمیر شروع کردی گئی۔ مقامی افراد کے مطابق یہ زمین مسجد کی ملکیت ہے اور اس پر بغیر کسی اطلاع یا اجازت کے کام کیا گیا۔
عینی شاہدین کے مطابق ہفتہ کی رات تقریباً دس افراد نے تیزی سے ٹین شیڈ اور دیگر تعمیری ڈھانچے کھڑے کیے۔ اس واقعہ کے بعد گاؤں میں مذہبی بنیادوں پر اختلافات ابھرنے لگے اور سماجی ہم آہنگی کو خطرہ لاحق ہوگیا۔
مقامی رہائشیوں نے اس کارروائی کو دانستہ طور پر دونوں برادریوں کے درمیان نفرت پھیلانے کی کوشش قرار دیا۔ ایک بزرگ شخص نے کہا:"ایسی حرکات کا مقصد کیا ہے؟ صرف نفرت اور فساد کو بڑھاوا دینا؟ یہ ہمارے گاؤں کی پرامن فضا کو خراب کرنے کی مذموم کوشش ہے۔”
واقعہ کے فوراً بعد مقامی افراد نے پولیس کو اطلاع دی، جس پر پولیس موقع پر پہنچی اور ابتدائی تحقیقات شروع کیں۔ حکام کا کہنا ہے کہ صورتحال پر قابو پالیا گیا ہے اور قانون کے مطابق کارروائی کی جائے گی۔
علاقائی رہنماؤں اور عوامی نمائندوں نے اس عمل کی شدید مذمت کرتے ہوئے حکومت سے مطالبہ کیا کہ مستقبل میں اس قسم کے واقعات کو روکنے کے لیے سخت اقدامات کیے جائیں۔
