واشنگٹن،۲۱؍مئی (اردو دنیا.اِن/ایجنسیز):معروف امریکی گلوکارہ اور اداکارہ جنیفر لوپیز ایک مرتبہ پھر قانونی مسائل کی زد میں آ گئیں۔ اس بار ان پر اپنی ہی تصاویر سوشل میڈیا پر پوسٹ کرنے پر کاپی رائٹ قوانین کی خلاف ورزی کا الزام عائد کیا گیا ہے۔
فوٹوگرافر ایڈون بلانکو اور فوٹو ایجنسی بیک گرڈ نے عدالت میں دعویٰ دائر کیا ہے کہ جنیفر لوپیز نے ان تصاویر کو انسٹاگرام اور ایکس (سابقہ ٹوئٹر) پر بغیر اجازت شائع کیا، حالانکہ یہ تصاویر ان کی کاپی رائٹ ملکیت ہیں۔
یہ تصاویر جنوری 2025 میں گولڈن گلوبز ایوارڈز سے ایک دن قبل ایمیزون ایم جی ایم اسٹوڈیوز اور وینیٹی فیئر پارٹی کے موقع پر لی گئی تھیں۔ جنیفر نے ان تصاویر کو "GG Weekend Glamour” کے کیپشن کے ساتھ شیئر کیا تھا۔
مدعیان نے مقدمے میں مؤقف اختیار کیا کہ ان تصاویر کو جنیفر لوپیز نے ذاتی تشہیر، مداحوں کی توجہ حاصل کرنے اور اپنے فیشن برانڈز کو فروغ دینے کے لیے استعمال کیا، جو کہ تجارتی استعمال کے زمرے میں آتا ہے۔
ایجنسی اور فوٹوگرافر نے ہر تصویر کے بدلے میں ڈیڑھ لاکھ ڈالر ہرجانے کا مطالبہ کیا ہے۔ مقدمے کے مطابق، لوپیز کے نمائندوں سے اس معاملے پر بات چیت جاری تھی اور ایک معاہدے کی کوشش کی گئی، تاہم ابھی تک اس پر دستخط نہیں ہوئے۔
قانونی ماہرین کے مطابق، جس شخص کی تصویر لی جائے وہ اس تصویر کا مالک نہیں ہوتا، بلکہ اصل کاپی رائٹ فوٹوگرافر یا متعلقہ ایجنسی کے پاس ہوتا ہے اور وہی تصویر کے استعمال کی اجازت دے سکتے ہیں۔
یہ پہلا موقع نہیں کہ جنیفر لوپیز کو ایسی قانونی پیچیدگی کا سامنا کرنا پڑا ہو۔ ماضی میں 2019 اور 2020 میں بھی ان پر اسی نوعیت کے کاپی رائٹ مقدمات دائر کیے گئے تھے۔ دیگر مشہور شخصیات جیسے دوآ لیپا، جیجی حدید اور خلوے کارڈیشین بھی اس نوعیت کے مقدمات میں ملوث رہ چکی ہیں۔
