میرے والد جاسوس تھے، والدہ افیون اسمگلر، جیکی چن کا حیران کن انکشاف

لاس اینجلس، 3 جون (اردو دنیا نیوز/ایجنسیز) — ہالی ووڈ کے عالمی شہرت یافتہ اداکار اور مارشل آرٹس کے ماہر جیکی چن نے ایک حالیہ انٹرویو میں اپنی ذاتی زندگی سے جڑے کچھ ایسے انکشافات کیے ہیں جنہوں نے دنیا بھر میں ان کے مداحوں کو حیرت میں ڈال دیا ہے۔ 71 سالہ جیکی چن، جو 1995 سے ہالی ووڈ فلم انڈسٹری سے وابستہ ہیں اور جنہیں 1998 کی کامیڈی فلم "رش آور” نے بین الاقوامی سطح پر اسٹار بنا دیا تھا، نے بتایا کہ ان کے والد ایک جاسوس اور ان کی والدہ افیون اسمگلر تھیں۔

جیکی چن نے انٹرویو میں اپنی ایک خاندانی تصویر دکھاتے ہوئے کہا کہ "یہ میرے والد چارلس اور والدہ للی کی تصویر ہے۔ مجھے یاد نہیں اس وقت میری عمر کتنی تھی، لیکن یہ ایک اہم یادگار ہے۔” انہوں نے انکشاف کیا کہ ان کے والد کا اصل پیشہ ایک خفیہ چینی جاسوس کا تھا، اور ان کی والدہ کا ماضی بھی خاصا پراسرار اور خفیہ تھا، جس میں وہ افیون اسمگلنگ اور جوئے جیسے غیر قانونی کاموں میں ملوث تھیں۔

اداکار نے بتایا کہ انہیں یہ سب اس وقت معلوم ہوا جب وہ 40 برس کے ہو چکے تھے۔ ایک دن وہ اپنے والد کے ساتھ گاڑی چلا رہے تھے جب ان کے والد نے اچانک کہا:

"بیٹا، میں اب بوڑھا ہو چکا ہوں، اگر سو گیا تو شاید دوبارہ نہ جاگ سکوں، اس لیے ایک راز بتانا چاہتا ہوں—تمہارا اصل نام چن نہیں بلکہ فنگ ہے۔”

جیکی چن نے کہا کہ وہ اس انکشاف پر اتنے حیران ہوئے کہ مزید کچھ سننے کی حالت میں نہیں تھے۔ انہوں نے اس واقعے کو اپنی زندگی کا ایک نہایت جذباتی لمحہ قرار دیا۔

اس انکشاف کے بعد جیکی چن نے اپنی زندگی اور خاندان کے پس منظر پر ایک ڈاکومنٹری بھی بنوائی جس کا عنوان تھا: "Jackie Chan and His Lost Family”۔ اس ڈاکومنٹری میں تفصیل سے بتایا گیا کہ ان کے والد 1940 کی دہائی میں چین میں جاری خانہ جنگی کے دوران سرکاری خفیہ ایجنسی سے منسلک تھے، اور ان کی والدہ افیون کی اسمگلنگ کے علاوہ جوئے کے دھندے میں بھی شامل تھیں۔ یہ تمام حقائق جیکی چن کے بچپن میں ان سے مکمل طور پر چھپائے گئے تھے۔

جیکی چن کا یہ انکشاف نہ صرف ان کے مداحوں کے لیے چونکا دینے والا ہے بلکہ یہ ظاہر کرتا ہے کہ کامیابی کی چمک دار دنیا کے پیچھے کیسے کئی راز، درد اور قربانیاں چھپی ہوتی ہیں۔ آج جیکی چن کو دنیا ایک عظیم اداکار، اسٹنٹ ماسٹر اور مارشل آرٹس کے لیجنڈ کے طور پر جانتی ہے، لیکن ان کا ماضی بتاتا ہے کہ انہوں نے ایک غیر معمولی پس منظر سے نکل کر خود کو عالمی سطح پر منوایا۔