سی بی آئی نے فرانسیسی ایمبیسی ویزا گھوٹالہ میں 8 ملزمین کے خلاف چارج شیٹ داخل کی

نئی دہلی، 11 جون۔:(اردودنیا.اِن/ایجنسیز)سی بی آئی نے فرانسیسی سفارت خانے میں ویزا گھوٹالے کے ایک بڑے معاملے میں آٹھ ملزمان کے خلاف نئی دہلی کی سی بی آئی عدالت میں چارج شیٹ داخل کی ہے۔ ملزمان میں فرانسیسی سفارتخانے کے ویزا ڈیپارٹمنٹ میں کام کرنے والا ایک مقامی لا آفیسر، اس کے والد، بھائی اور بیوی، دو ویزا ایجنٹس اور دو درمیانی افراد شامل ہیں۔

سی بی آئی کے بین الاقوامی آپریشن ڈویژن نے نئی دہلی میں فرانسیسی سفارت خانے میں ویزا فراڈ کی معلومات کی بنیاد پر مقدمہ درج کیا تھا۔ تفتیش میں یہ بات سامنے آئی کہ جنوری 2021 سے مئی 2022 کے درمیان ملزم لوکل لاء آفیسر نے پنجاب کے ویزہ درخواست گزاروں کو نشانہ بنایا اور شینگن ویزے کے نام پر نیٹ ورک کے ذریعے ان سے بھاری رقم بٹوری۔

پنجاب میں قائم ویزا ایجنٹس کا یہ نیٹ ورک ہر درخواست دہندہ سے 13 لاکھ سے 45 لاکھ روپے تک وصول کرتا تھا۔ ان رقوم کے عوض ان کی ویزہ درخواستوں پر کارروائی کی جاتی تھی اور ویزے جاری کیے جاتے تھے۔ بعد ازاں، ویزے کے اجرا کے بعد متعلقہ دستاویزات اور فائلیں تلف کر دی جاتیں۔

تحقیقات کے دوران پنجاب اور دہلی میں کئی مقامات پر چھاپے مارے گئے۔ ان کارروائیوں میں کروڑوں روپے کی جائیدادوں کے کاغذات اور بڑی مقدار میں نقدی برآمد ہوئی۔ دو ویزا ایجنٹس اس گھوٹالے کے اصل سازشی قرار دیے گئے ہیں، جنہوں نے بینک اکاؤنٹس کے ذریعے رقم لا آفیسر اور اس کے اہل خانہ کو منتقل کی۔

چارج شیٹ میں جن افراد کے نام شامل ہیں وہ درج ذیل ہیں: شبھم شوکین، ابھیشیک شوکین، سمندر سنگھ، آرتی چودھری، بلوندر سنگھ برتیا، پریت پال سنگھ، جشندیپ سنگھ سدھو اور بھون شوکین۔

بین الاقوامی سطح پر جرائم کی جائیداد کا سراغ لگانے کے لیے، سی بی آئی کے بین الاقوامی آپریشن ڈویژن اور بین الاقوامی پولیس کوآپریشن یونٹ نے تعاون کیا اور اس معاملے میں ہندوستان کا پہلا سلور نوٹس شائع کیا۔ بین الاقوامی ایجنسیوں کے تعاون سے شواہد اکٹھے کیے گئے۔

سی بی آئی نے اس بات کا اعادہ کیا ہے کہ وہ قومی اور بین الاقوامی سطح پر دھوکہ دہی اور جرائم کے خلاف پرعزم ہے اور متاثرین کو انصاف دلانے کی بھرپور کوشش جاری رکھے گی۔