تل ابیب میں موساد مرکز پر ایرانی حملہ، اسرائیل اور ایران میں کشیدگی کی نئی لہر

تہران :(اردودنیا.اِن/ایجنسیز)ایران کی جانب سے اسرائیل کے دارالحکومت تل ابیب میں واقع اسرائیلی انٹیلی جنس ایجنسی ’موساد‘ کے مرکز پر حملے کا دعویٰ سامنے آیا ہے۔ ایرانی سرکاری ٹی وی کے مطابق یہ کارروائی پاسدارانِ انقلاب نے منگل کے روز کی۔

اسرائیلی پولیس نے اس حملے کی تصدیق کرتے ہوئے بتایا کہ ایران سے داغے گئے میزائلوں کے نتیجے میں تل ابیب میں کئی مقامات پر دھماکوں کی آوازیں سنائی دیں۔ اسرائیلی فوج کا کہنا ہے کہ میزائل حملوں کے بعد پورے اسرائیل میں خطرے کے سائرن بجائے گئے۔

ایرانی پاسدارانِ انقلاب نے مزید میزائل حملوں کی لہر کی بھی تصدیق کی ہے۔ ایرانی خبر رساں ایجنسی "ارنا” کے مطابق ایک اعلیٰ فوجی کمانڈر نے کہا ہے کہ آئندہ گھنٹوں میں حملے مزید شدت اختیار کریں گے۔

ایرانی میڈیا کا کہنا ہے کہ تل ابیب، یروشلم اور حیفا میں دھماکوں کی آوازیں سنائی دی گئیں۔ جنرل کیومرث حیدری کے مطابق، تباہ کن ڈرونز نے اسرائیل میں اہم فوجی اور اسٹریٹیجک تنصیبات کو کامیابی سے نشانہ بنایا۔

اسرائیلی پولیس کا کہنا ہے کہ تل ابیب کے مختلف علاقوں میں گرنے والے میزائلوں اور ان کے ٹکڑوں سے مالی نقصان ہوا ہے، تاہم کسی جانی نقصان کی اطلاع نہیں ملی۔ بم ڈسپوزل یونٹس اور سکیورٹی فورسز متاثرہ علاقوں کو محفوظ بنانے میں مصروف ہیں۔

فائر بریگیڈ کو بھی گوش دان اور دیگر علاقوں میں میزائل گرنے اور آگ لگنے کی اطلاعات موصول ہوئیں۔

اسرائیلی فوج نے بیان میں کہا ہے کہ ایران کی جانب سے داغے گئے 18 میزائلوں میں سے 14 کو فضا میں تباہ کر دیا گیا، جبکہ باقی پانچ میزائل شمالی اور وسطی اسرائیل میں اپنے اہداف پر گرے، جن سے نقصان ہوا۔ ریسکیو اداروں کے مطابق ان حملوں میں زخمیوں کی تعداد 10 تک جا پہنچی ہے۔

اسرائیلی ذرائع کے مطابق تقریباً 30 میزائل ایک ہی وقت میں داغے گئے جن میں سے کئی وسطی اسرائیل میں گرے، اور ہرٹزیلیا شہر کی ایک رہائشی عمارت کو بھی نشانہ بنایا گیا۔

اسرائیلی فضائیہ نے جوابی کارروائی میں ایران کے مغربی علاقوں میں کئی فوجی اہداف کو نشانہ بنایا۔ اسرائیلی میڈیا کا کہنا ہے کہ ان حملوں کے دوران 30 سے زائد ایرانی ڈرونز کو تباہ کیا گیا۔

فوجی بیان کے مطابق اسرائیل نے ایران کے میزائل لانچنگ سائٹس، میزائل ڈپوؤں اور ڈرون مراکز پر حملے کیے۔ ان کا مقصد ایران کی عسکری صلاحیت کو کمزور کرنا ہے۔

پیر کے روز ایران کے دارالحکومت تہران میں واقع ایرانی سرکاری ٹی وی ہیڈکوارٹر پر اسرائیلی حملے کے نتیجے میں کم از کم تین افراد ہلاک اور کئی زخمی ہوئے۔ سرکاری ذرائع کے مطابق ہلاک ہونے والوں میں ٹی وی کے ملازمین شامل تھے۔

اسرائیل کا مؤقف ہے کہ اس کے حملے ایران کے جوہری اور بیلسٹک میزائل پروگرام سے لاحق خطرے کا جواب ہیں۔ دوسری جانب، ایران کا کہنا ہے کہ اس کی جوہری ٹیکنالوجی کا مقصد صرف پرامن مقاصد ہیں اور وہ ایٹمی ہتھیاروں کے پھیلاؤ کی مخالفت کرنے والے معاہدے کا رکن ہے۔