تلنگانہ ہائی کورٹ کا فیصلہ: ڈپلومہ ہولڈر کو DEECET کونسلنگ میں حصہ لینے کی اجازت

حیدرآباد:(اردودنیا.اِن/ایجنسیز) تلنگانہ ہائی کورٹ کے جسٹس کے لکشمن نے ریاستی تعلیمی حکام کو ہدایت دی ہے کہ وہ ایک ڈپلومہ ہولڈر کو جاری ڈپلومہ اِن ایلیمینٹری ایجوکیشن کامن انٹرنس ٹیسٹ (DEECET)-2025 کی کونسلنگ میں حصہ لینے کی اجازت دیں۔ عدالت نے کہا کہ درخواست گزار کی ڈگری انٹرمیڈیٹ کے مساوی ہے۔یہ فیصلہ کمپیلا ہریش کی طرف سے دائر کی گئی رِٹ پٹیشن پر سنوائی کے بعد سنایا گیا۔ ہریش، جو ارونکّا نگر، سری رام پور کے رہائشی ہیں، نے 2015 میں اسٹیٹ بورڈ آف ٹیکنیکل ایجوکیشن اینڈ ٹریننگ، تلنگانہ سے الیکٹریکل اینڈ الیکٹرانکس انجینئرنگ میں ڈپلومہ مکمل کیا تھا۔ انہوں نے دو سالہ ڈپلومہ اِن ایلیمینٹری ایجوکیشن اور پری اسکول ایجوکیشن کورسز میں داخلے کے لیے DEECET-2025 میں درخواست دی اور 3945 رینک حاصل کیا۔تاہم، سرٹیفکیٹ ویریفیکیشن کے دوران حکام نے انہیں اس بنیاد پر کونسلنگ سے روک دیا کہ ان کے پاس لازمی انٹرمیڈیٹ کی اہلیت نہیں ہے۔

ہریش نے 18 جون 2025 کو ایک نمائندگی جمع کرائی تھی، جس میں 16 جون 2025 کو ڈپٹی سکریٹری (اکیڈمک)، اسٹیٹ بورڈ آف ٹیکنیکل ایجوکیشن اینڈ ٹریننگ کی جانب سے جاری کردہ سرٹیفکیٹ اور 27 اکتوبر 2001 کے جی او ایم ایس نمبر 112 کی بنیاد پر اپنے ڈپلومہ کو انٹرمیڈیٹ کے مساوی تسلیم کرنے کی درخواست کی گئی تھی۔عدالت نے نوٹ کیا کہ متعلقہ ڈپلومہ واقعی 10+2 کے مساوی ہے، جس کی تصدیق ریاستی بورڈ اور سرکاری حکم نامے دونوں نے کی ہے۔ عدالت نے کہا کہ "سرکاری محکمے ایک آواز میں بات کریں اور آپس میں تضاد نہ رکھیں”۔جسٹس کے لکشمن نے DEECET-2025 کے کنوینر اور محکمہ اسکول ایجوکیشن کو ہدایت دی کہ وہ درخواست گزار کے سرٹیفکیٹس کی جانچ کریں اور اگر وہ دیگر اعتبار سے اہل ہوں تو بغیر کسی اعتراض کے انہیں داخلہ دیا جائے۔