"لاؤڈ اسپیکر بجا تو قانون گرجے گا!” — مہاراشٹر پولیس نے ریاست بھر میں سخت ضابطے لاگو کر دیے
"سب کے لیے ایک قانون: مہاراشٹر پولیس کا لاؤڈ اسپیکر پر سخت شکنجہ"
ممبئی :(اردودنیا.اِن/ایجنسیز)مہاراشٹرا پولیس نے لاؤڈ اسپیکر کے غیر قانونی استعمال اور شور کی سطح کی خلاف ورزیوں کے خلاف سخت اقدامات کرنے کے لیے ریاست بھر کے پولیس افسران کو نیا اسٹینڈرڈ آپریٹنگ پروسیجر (SOP) جاری کر دیا ہے۔ اس سلسلے میں تمام پولیس کمشنروں اور سپرنٹنڈنٹس آف پولیس کو ہدایت دی گئی ہے کہ وہ مذہبی یا عوامی مقامات پر لاؤڈ اسپیکر کے استعمال سے متعلق قوانین پر یکساں طور پر عمل درآمد کو یقینی بنائیں۔
پولیس کے ایڈیشنل ڈائریکٹر جنرل برائے قانون و نظم، نکھل گپتا نے یہ تفصیلی ہدایت نامہ جاری کیا ہے جس میں فیلڈ افسران کی ذمہ داریاں واضح کی گئی ہیں۔ چھترپتی سمبھاجی نگر کے پولیس کمشنر پربھین پوار نے بتایا کہ "قانون تمام مذہبی اور عوامی مقامات پر یکساں طور پر نافذ کیا جا رہا ہے، اور لاؤڈ اسپیکر استعمال کرنے والوں کو ہدایت دی گئی ہے کہ وہ استعمال کو باقاعدہ بنائیں، بصورت دیگر کارروائی کی جائے گی۔”
ایس او پی کے مطابق، جب کسی جگہ شور کی شکایت موصول ہو گی تو ایک مقررہ افسر (سب انسپکٹر یا اس سے اوپر رینک کا) شور ناپنے والے آلے (Noise Meter) کے ساتھ دو غیر جانب دار پنچ گواہوں کو لے کر جائے وقوعہ پر جائے گا۔ وہاں شور کی سطح ناپی جائے گی اور اس کا ریکارڈ پرنٹ آؤٹ لے کر گواہوں کے دستخط سے تصدیق کی جائے گی۔ اس کے بعد ایک تفصیلی پنچنامہ تیار کیا جائے گا جس میں مقام کا پتہ، اسٹیبلشمنٹ کی نوعیت (مذہبی یا دیگر)، رجسٹریشن کی تفصیل، منتظمین یا کمیٹی کے نام، ریکارڈ شدہ ڈیسیبل سطح، اور علاقہ بندی (رہائشی، تجارتی، صنعتی یا خاموش زون) کی معلومات شامل ہوں گی۔
اگر زوننگ کی وضاحت نہ ہو، تو اس کا تعین علاقے کے غالب استعمال کی بنیاد پر کیا جائے گا۔ ہدایت نامے میں دن کا وقت صبح 6 بجے سے رات 10 بجے تک اور رات کا وقت 10 بجے سے صبح 6 بجے تک مقرر کیا گیا ہے۔
افسر جائے وقوعہ کا معائنہ مکمل کرنے کے بعد اپنی رپورٹ متعلقہ پولیس کمشنر یا ایس پی اور مہاراشٹر پلوشن کنٹرول بورڈ (MPCB) کو پیش کرے گا۔ اس کے بعد سینئر افسران شکایت کنندہ کو مطلع کرتے ہوئے وارننگ جاری کرنے یا ایف آئی آر درج کرنے جیسے اقدامات کریں گے۔ اگر خلاف ورزی ثابت ہو جائے تو قانون کے تحت جرمانے، قید، اور بار بار کی خلاف ورزی پر لاؤڈ اسپیکر ضبط کرنے اور عدالتی کارروائی کی جا سکتی ہے۔ ماحولیاتی قوانین کے تحت MPCB بھی علیحدہ کارروائی کا اختیار رکھتا ہے۔ا
