ایئر انڈیا نے بوئنگ طیاروں کے فیول سوئچ کا معائنہ مکمل کرلیا، کوئی خرابی نہیں ملی

نئی دہلی، 22 جولائی(اردو دنیا/ایجنسیز)ایئر انڈیا نے منگل کو اعلان کیا ہے کہ اس نے اپنے بیڑے میں شامل تمام بوئنگ 787 اور بوئنگ 737 طیاروں کے فیول کنٹرول سوئچ (FCS) کے لاکنگ سسٹم کا معائنہ مکمل کر لیا ہے اور کسی بھی قسم کی خرابی نہیں ملی۔یہ معائنہ ڈی جی سی اے (DGCA) کی جانب سے جولائی کے وسط میں جاری کردہ حفاظتی ہدایات کے مطابق کیا گیا۔ معائنہ 12 جولائی کو شروع ہوا تھا اور مقررہ وقت میں مکمل کر کے رپورٹ ریگولیٹر کو فراہم کر دی گئی۔

یہ احتیاطی قدم اُس وقت اٹھایا گیا جب گزشتہ ماہ احمد آباد میں ایک ایئر انڈیا ڈریم لائنر طیارے کے حادثے میں 260 افراد جاں بحق ہوئے۔ ابتدائی تحقیقات میں یہ بات سامنے آئی کہ فیول سپلائی بند ہونے کی وجہ سے انجن ٹیک آف کے فوراً بعد بند ہو گئے تھے۔تحقیقات کے مطابق، یہ فیول سوئچ کے اچانک حرکت کرنے کی وجہ سے ہوا، جس سے ایک بار پھر انجن فیول کٹ آف سوئچ کے ڈیزائن پر سوالات اٹھے۔

حادثے اور ڈی جی سی اے کی 14 جولائی کی ہدایت کے بعد، ایئر انڈیا اور اس کی ذیلی بجٹ ایئرلائن ایئر انڈیا ایکسپریس نے فوری طور پر رضاکارانہ معائنہ شروع کیا، جو کامیابی سے مکمل ہو گیا۔بیان کے مطابق، معائنے کے دوران تمام طیاروں کی جانچ کی گئی اور کوئی تکنیکی خرابی نہیں پائی گئی۔ ایئر لائن نے کہا ہے کہ مسافروں اور عملے کی حفاظت اس کی اولین ترجیح ہے۔

ایئر انڈیا کے ساتھ ساتھ، ایمریٹس سمیت کئی بین الاقوامی ایئر لائنز نے بھی بوئنگ طیاروں کی احتیاطی جانچ شروع کر دی ہے۔ امریکی ایوی ایشن ریگولیٹر نے یقین دہانی کرائی ہے کہ فیول کنٹرول سوئچ کا ڈیزائن محفوظ ہے۔