واشنگٹن ۲۹؍جولائی:(اردودنیا.اِن/ایجنسیز)4 دہائیوں قبل سپر ماریو ویڈیو گیم دنیا بھر میں بہت زیادہ مقبول ہوئی تھی۔اس نے دیگر گیمز کو پیچھے چھوڑ کر اپنے عہد میں سب سے مقبول گیم کا اعزاز اپنے نام کرلیا تھا۔سپر ماریو بروز گیم کو ستمبر 1985 میں متعارف کرایا گیا تھا، شروع میں جاپان میں اسے پیش کیا گیا اور پھر بتدریج دنیا بھر میں لوگ اسے کھیلنے لگے۔جس کمپنی نے اسے تیار کیا گیا اس کے مطابق گیم کی بدولت اس کے سسٹم کی 4 کروڑ سے زائد کاپیز فروخت ہوئیں اور اس طرح یہ ہر دور کی مقبول ترین گیمز میں سے ایک بن گئی۔

اس گیم میں ایک مونچھوں والے پلمبر ماریو کو دکھایا جاتا ہے جس نے سرخ ٹوپی پہنی ہوئی ہوتی ہے اور بیشتر افراد چہرہ دیکھ کر ہی اسے پہچان لیتے ہیں، چاہے انہوں نے ماریو گیم کھیلی ہو یا نہ ہو۔ماریو کا کردار 200 سے زائد مختلف ویڈیوز گیمز کا حصہ بنا اور اسے سب سے زیادہ فروخت ہونے والی ویڈیو گیم فرنچائز قرار دیا جاتا ہے۔

مگر اس کا نام ماریو کیوں رکھا گیا؟

جب اس گیم کو تیار کیا گیا تھا تو ڈیزائنر نے اسے جمپ مین کا نام دیا تھا۔مگر کمپنی کے واشنگٹن کے کرائے کے گودام کے ملازمین نے اس گیم کریکٹر کو ماریو کہنا شروع کر دیا کیونکہ انہیں لگتا تھا کہ یہ کردار دیکھنے میں گودام کے مالک سے بہت زیادہ ملتا جلتا ہے۔گودام کے مالک کا نام ماریو سی گل تھا اور ملازمین کی جانب سے کردار کو ماریو کہنے پر کمپنی نے نام تبدیل کر دیا۔

اگر نام میں غیرمتوقع تبدیلی نہ کی جاتی تو ممکن ہے کہ یہ کردار آج اتنا مقبول نہ ہوتا یا اسے جمپ مین کہا جاتا۔زیادہ دلچسپ بات یہ ہے کہ ماریو کے کردار کو پہلی بار ڈونکی کونگ گیم دی لیجنڈ آف زیلڈا کا حصہ بنایا گیا تھا جہاں وہ کارپینٹنگ کا کام کرتا تھا۔4 سال بعد اسے پلمبر میں تبدیل کرکے انڈر گرانڈ پائپس اور سیوریج والی گیم کا مرکزی کردار بنا دیا گیا۔گیم کے اوریجنل ماسٹر مائنڈ Shigeru Miyamoto نے 2015 کے انٹرویو میں بتایا کہ ‘واشنگٹن کے ملازمین نے اس کردار کو ماریو کہنا شروع کیا اور جب میں نے اسے سنا تو خود سے کہا کہ اوہ ماریو زبردست نام ہے، اسے ہی استعمال کرنا چاہیے’۔