بلند شہر سیانہ تشدد کیس: 7 سال بعد عدالت کا تاریخی فیصلہ، 5 مجرموں کو عمر قید،33 کو 7 سال کی سزا

اترپردیش/بلندشہر:(اردودنیا.اِن/ایجنسیز) 2018 میں گائے کے گوشت کے مبینہ واقعے کے بعد بھڑکے فرقہ وارانہ تشدد کے معاملے میں اترپردیش کی ایک عدالت نے جمعہ کے روز اہم فیصلہ سناتے ہوئے پانچ مجرموں کو عمر قید اور 33 دیگر شرپسندوں کو 7 سال قید کی سزا سنائی ہے۔ اس واقعے میں پولیس انسپکٹر سبودھ کمار سنگھ اور ایک نوجوان سمیت دو افراد ہلاک ہو گئے تھے۔

یہ فیصلہ ایڈیشنل ڈسٹرکٹ اینڈ سیشن جج گوپال جی نے سخت سیکورٹی کے درمیان سنایا۔ عدالت میں تمام 38 قصورواروں کو سزا سنائی گئی، جن میں پانچ کو قتل اور دیگر کو ہنگامہ آرائی، اقدام قتل، اور عوامی خدمت گزار کو روکنے کے جرائم میں سزا دی گئی۔

دفاعی وکیل اشوک ڈاگر نے بتایا کہ:
"پانچ مجرموں کو تعزیرات ہند کی دفعہ 302 (قتل) کے تحت عمر قید کی سزا دی گئی، جبکہ باقی سزا یافتگان کو دفعہ 307 (اقدام قتل)، 436 (آگ زنی)، 332 اور 353 کے تحت 7 سال قید سنائی گئی۔”

عمر قید کی سزا پانے والے مجرموں میں شامل ہیں: راہول، ڈیوڈ، پرشانت ناٹ، لوکندر سنگھ اور جانی — تمام کا تعلق سیانہ تھانے کے تحت چنگراوتھی گاؤں سے ہے۔

واضح رہے کہ عدالت نے 30 جولائی کو 38 قصورواروں کو مجرم قرار دیا تھا، تاہم دو افراد کے خلاف قتل کے الزامات کو کم کر کے اقدام قتل اور ہنگامہ آرائی میں تبدیل کر دیا گیا۔ ان میں بجرنگ دل کا مقامی رہنما یوگیش راج اور سابق فوجی جتیندر ملک شامل ہیں۔

پولیس نے اس کیس میں کل 44 افراد کو ملزم بنایا تھا، جن میں کچھ ضلع پنچایت کے رکن بھی شامل تھے۔ ٹرائل کے دوران 5 ملزمان کی موت ہو گئی، جبکہ ایک نابالغ کو پہلے ہی رہا کر دیا گیا تھا۔

یہ واقعہ 3 دسمبر 2018 کو پیش آیا تھا جب بلندشہر کے چنگراوتھی گاؤں میں گائے کے گوشت کی مبینہ برآمدگی پر اشتعال پھیل گیا۔ مشتعل ہجوم نے گاڑیوں کو نذر آتش کیا اور ایک پولیس چوکی کو آگ لگا دی۔انسپکٹر سبودھ کمار سنگھ مظاہرین کو قابو میں کرنے کی کوشش کے دوران فائرنگ کا نشانہ بنے اور ہلاک ہو گئے، جبکہ ایک دیہی نوجوان سمت کمار بھی جان سے ہاتھ دھو بیٹھا۔