نابالغ لڑکی کے ساتھ اجتماعی زیادتی، 15 سالہ ملزم سمیت دو گرفتار، رقم بھی لوٹ لی گئی
لڑکی کو بلیک میل کرنے کی نیت سے اس کی ویڈیو بنانے لگے۔
کانپور (اردو دنیا / ایجنسیز): اترپردیش کے شہر کانپور میں ایک نابالغ لڑکی سے اجتماعی زیادتی کا سنگین واقعہ سامنے آیا ہے۔ پولیس نے کارروائی کرتے ہوئے دو ملزمان کو گرفتار کر لیا ہے، جبکہ تیسرا مرکزی ملزم واردات کے بعد سے مفرور ہے۔ پولیس کے مطابق، گرفتار افراد میں ایک کی عمر 15 سال اور دوسرے دیویانشو عرف لکی کی عمر 19 سال ہے۔ تیسرے ملزم مہیش (19 سال) کی تلاش کے لیے ٹیمیں چھاپے مار رہی ہیں۔
ڈپٹی کمشنر آف پولیس (ایسٹ) ستیہ جیت گپتا کے مطابق، متاثرہ لڑکی نے بتایا کہ وہ 26 جولائی کو اپنے دوست مہیش کے ساتھ خریداری کے بہانے نکلی تھی۔ مہیش اسے مہاراج پور کے ایک سنسان مقام پر لے گیا، جہاں اس نے اس کے ساتھ زبردستی زیادتی کی۔ اسی دوران دو اور نوجوان، دیویانشو اور اس کا نابالغ دوست وہاں پہنچے۔ دونوں نے لڑکی کی ویڈیو بنانی شروع کر دی اور اسے 7000 روپے ادا کرنے کا مطالبہ کیا۔ لڑکی نے بتایا کہ اس کے پاس رقم نہیں تھی۔ دونوں لڑکوں نے اس کے ساتھ چھیڑ چھاڑ شروع کی، جبکہ مہیش موقع سے فرار ہوگیا۔ مایوسی کے عالم میں لڑکی نے اپنی ناک کی نتھنی دے کر جان چھڑانے کی کوشش کی، مگر دونوں نے مبینہ طور پر اس کے ساتھ اجتماعی زیادتی کی۔
جانے سے قبل وہ اس سے تقریباً 1000 روپے نقدی بھی لوٹ کر فرار ہوگئے۔ بعد ازاں لڑکی کو موٹر سائیکل پر اس کے گھر کے قریب چھوڑ دیا گیا۔ متاثرہ لڑکی نے کچھ دن بعد ہمت کر کے مہاراج پور پولیس میں شکایت درج کرائی، جس کے بعد کرائم برانچ کی مدد سے دیویانشو اور نابالغ کو گرفتار کر لیا گیا۔ دونوں کو عدالت میں پیش کیا گیا، جہاں بالغ ملزم کو جیل اور نابالغ کو جووینائل ہوم بھیج دیا گیا ہے۔ مرکزی ملزم مہیش تاحال فرار ہے۔ پولیس کا کہنا ہے کہ اسے جلد گرفتار کر لیا جائے گا۔ لڑکی کا طبی معائنہ بھی کیا گیا ہے اور رپورٹ کا انتظار ہے۔
