سپریم کورٹ کا کتوں کے حامیوں اور این جی اوز کو الٹی میٹم

نئی دہلی، 22 اگست (اردودنیا.اِن/ایجنسیز)سپریم کورٹ نے آوارہ کتوں کے معاملے میں بڑا فیصلہ سناتے ہوئے دہلی-این سی آر میں کتوں کے حامی افراد اور این جی اوز کو حکم دیا ہے کہ وہ سات دن کے اندر عدالت میں رقم جمع کریں، بصورت دیگر انہیں کیس میں حصہ لینے کی اجازت نہیں ہوگی۔

جمعہ کو جسٹس وکرم ناتھ، جسٹس سندیپ مہتا اور جسٹس این وی انجاریا پر مشتمل تین رکنی بنچ نے حکم دیا کہ کتوں سے محبت کرنے والے افراد 25 ہزار روپے اور این جی اوز 2 لاکھ روپے جمع کرائیں۔ یہ رقم متعلقہ میونسپل اداروں کے زیر انتظام آوارہ کتوں کی فلاح و بہبود، بانجھ پن، ٹیکہ کاری اور پناہ گاہوں کے انفراسٹرکچر میں استعمال کی جائے گی۔

آوارہ کتوں کے لیے سپریم کورٹ کے اہم احکامات

• کتے کے حامی افراد کو گود لینے کے بعد اس بات کی ذمہ داری ہوگی کہ وہ کتے کو سڑک پر واپس نہ آنے دیں۔

• این جی اوز کو بھی اپنے زیر نگرانی کتوں کی مکمل ذمہ داری لینی ہوگی۔

• آوارہ کتوں کی بانجھ پن اور ٹیکہ کاری کے بعد انہیں دوبارہ اسی علاقے میں چھوڑا جائے گا۔

• دہلی، غازی آباد، نوئیڈا، فرید آباد اور گروگرام میں میونسپل ادارے آوارہ کتوں کو سنبھالنے کے پابند ہوں گے۔

عدالت کے اس فیصلے کے بعد ملک بھر میں ایک نئی بحث چھڑ گئی ہے، کیونکہ 11 اگست کے حکم کے بعد بڑے پیمانے پر احتجاج ہوا تھا۔ تاہم سپریم کورٹ نے اپنے پرانے حکم کو فی الحال التواء میں رکھتے ہوئے نیا فیصلہ سنایا ہے۔