شیوسینا رہنما سنجے راؤت کی طبیعت ناساز، ممبئی کے فورٹس اسپتال میں داخل

ممبئی :(اردودنیا.اِن/ایجنسیز)شیوسینا ٹھاکرے گروپ کے رکن پارلیمنٹ سنجے راؤت کو اتوار کے روز اچانک طبیعت خراب ہونے کے بعد ممبئی کے بھانڈوپ علاقے میں واقع فورٹس اسپتال میں داخل کرایا گیا۔ ذرائع کے مطابق چند روز قبل ان کا اسی اسپتال میں معمول کا بلڈ ٹیسٹ کیا گیا تھا۔ حالانکہ ان کی اچانک داخلے کی تفصیلات ابھی سامنے نہیں آئیں، لیکن اسپتال کے حکام نے بتایا ہے کہ ان کی حالت فی الحال مستحکم ہے۔

اطلاعات کے مطابق سنجے راؤت نے اسپتال میں داخل ہونے سے چند گھنٹے قبل ہی میڈیا سے گفتگو کی تھی اور اپنی روز مرہ سیاسی مصروفیات میں مصروف تھے۔ پریس کانفرنس کے دوران انہوں نے ایک اہم بیان دیتے ہوئے کہا کہ راج ٹھاکرے کانگریس کے ساتھ بات چیت کے حق میں ہیں، جو مہا وکاس اگھاڑی (MVA) کا ایک اہم اتحادی ہے۔

راؤت کے اس بیان نے سیاسی حلقوں میں نئی بحث چھیڑ دی ہے۔ گزشتہ چند دنوں سے ادھو ٹھاکرے اور راج ٹھاکرے کے درمیان تعلقات میں بہتری کی خبریں گردش کر رہی ہیں، اور سنجے راؤت اس سیاسی قربت میں کلیدی کردار ادا کر رہے ہیں۔ شیوسینا (ٹھاکرے گروپ) کی قیادت میں پارٹی اتحاد اور سیاسی ہم آہنگی کے حق میں بیانات دیے جا رہے ہیں۔

سنجے راؤت کی اچانک اسپتال میں داخل ہونے کی خبر سے ان کے حامیوں اور پارٹی کارکنوں میں تشویش کی لہر دوڑ گئی ہے۔ بہت سے سیاسی رہنماؤں نے ان کی جلد صحتیابی کی دعا کی ہے۔ اس وقت سب کی نظریں فورٹس اسپتال پر مرکوز ہیں، جہاں سے ان کی صحت کے بارے میں مزید معلومات جلد متوقع ہیں۔a