علی گڑھ میں کشیدگی، مندروں کی دیواروں پر ’آئی لو محمد‘ لکھنے سے ہنگامہ، آٹھ افراد کے خلاف مقدمہ درج

علی گڑھ، اتر پردیش:(اردودنیا.اِن/ایجنسیز)علی گڑھ ضلع کے لودھا تھانہ علاقے میں ہفتے کے روز اس وقت کشیدگی پھیل گئی جب دو قریبی دیہات — بھگوان پور اور بُلاکی گڑھ — کے پانچ مندروں کی دیواروں پر "آئی لو محمد” کے الفاظ لکھے ہوئے پائے گئے۔

پولیس کے مطابق، واقعے کی اطلاع ملتے ہی سینئر سپرنٹنڈنٹ آف پولیس (ایس ایس پی) نیرج کمار، دیگر اعلیٰ افسران، فارنزک ماہرین اور پولیس کے تفتیشی کتوں کے ساتھ موقع پر پہنچ گئے۔ علاقے میں بھاری پولیس فورس تعینات کر دی گئی ہے اور آس پاس کے سی سی ٹی وی فوٹیج کی جانچ جاری ہے۔

پولیس نے ابتدائی تفتیش کے بعد مستقیم، گل محمد، سلیمان، سونو، اللہ بخش، حمید اور یوسف سمیت آٹھ افراد کے خلاف مقدمہ درج کیا ہے۔

ایس ایس پی نیرج کمار نے میڈیا سے گفتگو میں کہا کہ “ہم اس واقعے کو انتہائی سنجیدگی سے لے رہے ہیں، تمام پہلوؤں کی گہرائی سے جانچ ہو رہی ہے، کسی مجرم کو بخشا نہیں جائے گا۔”ان کا کہنا تھا کہ پولیس اس واقعے میں زمین کے ممکنہ تنازعے کے زاویے سے بھی تفتیش کر رہی ہے۔

اسی دوران، اس واقعے کی شکایت درج کرانے والے کرنی سینا کے رہنما گیانندر سنگھ چوہان نے مقامی پولیس پر غفلت برتنے کا الزام لگایا۔انہوں نے کہا کہ افسران نے اصل ملزمان پر کارروائی کرنے کے بجائے اطلاع دینے والے گاؤں کے رہائشی کو ہی حراست میں لے لیا۔

چوہان نے مزید دعویٰ کیا کہ پولیس نے “معاملے کو ٹھنڈا کرنے” کے لیے مندر کی دیواروں پر لکھے گئے نعرے مٹانے کی کوشش کی، جس سے مقامی لوگوں میں غصہ پھیل گیا۔فی الحال علاقے میں حالات کشیدہ ضرور ہیں، لیکن پولیس فورس کی موجودگی میں صورتحال قابو میں بتائی جا رہی ہے۔ علی گڑھ پولیس نے شہریوں سے امن و امان برقرار رکھنے کی اپیل کی ہے۔