امیش پال قتل کیس:عتیق احمد کے بیٹے عمر اور علی کے خلاف گینگسٹر ایکٹ کے تحت چارج شیٹ دائر

نئی دہلی:(اردودنیا.اِن/ایجنسیز) پریاگ راج پولیس نے امیش پال قتل کیس میں سابق رکن اسمبلی عتیق احمد کے بیٹوں عمر احمد اور علی احمد کے خلاف گینگسٹر ایکٹ کے تحت چارج شیٹ دائر کر دی۔ پولیس نے یہ چارج شیٹ ایک خصوصی عدالت میں داخل کی، جس میں دونوں پر 24 فروری 2023 کو ایڈوکیٹ امیش پال کے قتل کی سازش اور واقعے میں براہ راست ملوث ہونے کا الزام عائد کیا گیا ہے۔

ذرائع کے مطابق عدالت نے اس معاملے میں پولیس کو دو دن بعد کی تاریخ دی ہے تاکہ مزید سماعت کی جا سکے۔ چارج شیٹ کے بعد ملزمان پر قانونی گرفت مزید سخت ہو جائے گی، اور ان کے لیے ضمانت حاصل کرنا تقریباً ناممکن ہو جائے گا۔

امیش پال قتل کیس میں عتیق احمد کے بیٹوں علی اور عمر کے علاوہ عتیق کے وکیل وجے مشرا، خان صولت حنیف، اخلاق احمد، صداقت خان، عتیق کی اہلیہ شائستہ پروین، اس کی بہن عائشہ نوری، اشرف کی بیوی زینب اور دیگر ملزمان کے خلاف بھی چارج شیٹ داخل کی گئی ہے۔

تاہم، شائستہ پروین، عائشہ نوری، زینب، گڈو مسلم، ارمان اور صابر اب بھی مفرور ہیں۔ پولیس کا کہنا ہے کہ ان کے خلاف گرفتاری کے وارنٹ جاری ہیں اور قریبی رشتہ داروں کے بیانات بھی قلمبند کیے جا چکے ہیں۔

منگل کو دھوم گنج پولیس نے عمر احمد اور علی احمد سمیت دیگر گرفتار ملزمان کے خلاف گینگسٹر ایکٹ کے تحت چارج شیٹ داخل کی۔ پولیس ذرائع کا کہنا ہے کہ اس کارروائی کے بعد ملزمان کی جائیدادوں کی جانچ اور ضبطی کی راہ بھی ہموار ہو جائے گی۔

واضح رہے کہ علی احمد کو حال ہی میں نینی جیل سے جھانسی جیل منتقل کیا گیا تھا، جبکہ عمر احمد پہلے ہی عدالتی حراست میں ہے۔

پولیس حکام نے تفتیش کی تفصیلات ظاہر کرنے سے گریز کیا ہے، تاہم ذرائع کے مطابق مزید ثبوتوں کے ساتھ مقدمے کو جلد خصوصی عدالت میں سماعت کے لیے پیش کیا جائے گا۔