پونے میں عجیب و غریب آن لائن اسکیم کا انکشاف، جعلی ’پریگننسی جاب‘ کے نام پر 11 لاکھ کی لوٹ

ممبئی: (اردو دنیا نیوز / ایجنسیز)موجودہ ڈیجیٹل دور میں سائبر کرائم کے واقعات دن بہ دن بڑھتے جا رہے ہیں۔ عوام کے سادہ لوح رویے اور جلد امیر بننے کی خواہش کا فائدہ اٹھا کر آن لائن دھوکے باز لوگ لاکھوں روپے لوٹ رہے ہیں۔ ایسا ہی ایک حیران کن واقعہ مہاراشٹر کے پونے میں پیش آیا ہے، جہاں ایک 44 سالہ کنٹریکٹر ایک جعلی اشتہار کے جال میں پھنس کر 11 لاکھ روپے سے محروم ہو گیا۔

اطلاعات کے مطابق متاثرہ کنٹریکٹر کو سوشل میڈیا پر ایک اشتہار نظر آیا جس میں لکھا تھا کہ ’’اگر کوئی صحت مند مرد ایک خاتون کو ماں بننے میں مدد کرے تو اسے 25 لاکھ روپے دیے جائیں گے‘‘۔ اشتہار میں ایک فون نمبر بھی درج تھا۔ اس پر متاثرہ شخص نے فوری کال کی، جہاں ایک شخص نے خود کو ’’پریگننسی جاب ایجنسی‘‘ کا اسسٹنٹ بتاتے ہوئے بات شروع کی۔

دھوکے باز نے کنٹریکٹر سے کہا کہ خاتون سے ملاقات سے پہلے کمپنی میں رجسٹریشن کروانا ضروری ہے، جس کے لیے مختلف فیسیں ادا کرنی ہوں گی۔ رجسٹریشن فیس، شناختی کارڈ فیس، جی ایس ٹی، ٹی ڈی ایس اور پروسیسنگ فیس کے نام پر اس سے بار بار رقم طلب کی گئی۔ 25 لاکھ حاصل کرنے کی لالچ میں کنٹریکٹر نے 100 سے زائد بار آن لائن ادائیگی کی، جس کی مجموعی رقم 11 لاکھ روپے تک پہنچ گئی۔

اتنی رقم دینے کے باوجود جب کوئی نتیجہ سامنے نہیں آیا تو متاثرہ شخص کو شک ہوا۔ اس نے ملزم سے رقم کے بارے میں سخت سوال کیے تو دوسرے شخص نے اس کا نمبر بلاک کر دیا۔ تب جا کر کنٹریکٹر کو احساس ہوا کہ وہ آن لائن فراڈ کا شکار ہو گیا ہے۔

متاثرہ نے فوراً پونے کے  پولیس اسٹیشن میں شکایت درج کرائی۔ پولیس نے مقدمہ درج کر کے دیے گئے فون نمبرز اور بینک اکاؤنٹس کی جانچ شروع کر دی ہے۔ ابتدائی تفتیش میں پتہ چلا ہے کہ یہ دھوکہ دہی کا نیٹ ورک بہار کے نوادہ ضلع سے چلایا جا رہا ہے۔ پولیس ٹیمیں ملوث افراد کی گرفتاری کے لیے سرگرم ہیں۔