اصلی پیکٹ میں جعلی ‘نندنی’ گھی؛ ناریل اور پام آئل سے تیار نقلی گھی فروخت کرنے پر میاں بیوی گرفتار

بنگلورو :(اردودنیا.اِن/ایجنسیز)بنگلورو پولیس نے ایک بڑی کامیابی حاصل کی ہے۔ جعلی ’نندنی‘ گھی ریکیٹ کا پردہ فاش کرنے کے چند دن بعد ہی پولیس نے اس کے ماسٹر مائنڈ کو گرفتار کر لیا۔ پولیس کے مطابق ریکیٹ کے سرغنہ شیوکمار اور اس کی بیوی رامیا کو بدھ کے روز حراست میں لیا گیا۔ اس سے پہلے اس کیس میں چار دیگر ملزمان کو بھی گرفتار کیا جا چکا ہے۔

پولیس کے مطابق شیوکمار جوڑا ایک مکمل مینوفیکچرنگ یونٹ چلاتا تھا جہاں کرناٹک ملک فیڈریشن (KMF) کے مشہور ’نندنی‘ برانڈ کے نام سے بڑے پیمانے پر جعلی گھی تیار کیا جا رہا تھا۔ ملزمان اصل پیکیجنگ کی نقل تیار کر کے صارفین کو دھوکہ دے رہے تھے۔

اطلاع ملنے پر سینٹرل کرائم برانچ (سی سی بی) کی ٹیم نے فیکٹری پر چھاپہ مارا۔ موقع پر ہائی ٹیک مشینری اور صنعتی آلات پایا گیا جس کی مدد سے جعلی گھی کو بالکل اصلی کی طرح پیک کیا جاتا تھا۔ پولیس نے تمام مشینری اور خام مال کو ضبط کر کے فیکٹری کو سیل کر دیا۔

14 نومبر کو CCB کی خصوصی ٹیم اور KMF ویجیلنس یونٹ نے مشترکہ کارروائی کی تھی۔ ایک خفیہ اطلاع کے بعد چامراج پیٹ کے نانجمبا اگرہارا علاقے میں واقع کرشنا انٹرپرائزز کے گوداموں اور دکانوں پر چھاپے مارے گئے۔ اسی دوران تمل ناڈو سے ملاوٹ شدہ گھی لا رہی ایک گاڑی کو بھی پکڑ لیا گیا۔

کارروائی کے دوران پولیس نے مجموعی طور پر 1.26 کروڑ روپے کی جائیداد ضبط کی۔ اس میں 8136 لیٹر ملاوٹ شدہ گھی (قیمت تقریباً 56.95 لاکھ روپے)، صنعتی مشینری، ناریل اور پام آئل، پانچ موبائل فون، 1.19 لاکھ روپے نقد اور چار بولیرو پک اپ گاڑیاں شامل تھیں جن کی قیمت تقریباً 60 لاکھ روپے ہے۔

تحقیقات میں انکشاف ہوا کہ جنوبی ہند میں ’نندنی‘ برانڈ کی بھاری مانگ کو دیکھتے ہوئے ملزمان نے اس کی پیکیجنگ کی ہوبہو نقل تیار کی اور زیادہ منافع حاصل کرنے کے لیے ملاوٹ شدہ گھی کو اصلی پیکٹ میں بھر کر مہنگے داموں فروخت کرتے رہے۔ KMF کی اندرونی تحقیقات کے دوران سپلائی چین میں مشتبہ بے ضابطگیوں کی نشاندہی ہوئی، جس کے بعد پورا ریکیٹ بے نقاب ہو گیا۔

پولیس اب اس بات کی بھی جانچ کر رہی ہے کہ آیا ملاوٹ شدہ گھی میں جانوروں کی چربی شامل کی گئی تھی یا نہیں، کیونکہ اس سے صارفین کی صحت پر سنگین اثرات مرتب ہو سکتے ہیں۔