کرسٹیانو رونالڈو کی شادی 511 سال پرانے کیتھیڈرل میں ہوگی، جورجینا کے لیے تاریخی مقام کا انتخاب
یہ مقام نہ صرف تاریخی اہمیت رکھتا ہے بلکہ رونالڈو کے آبائی شہر کی پہچان بھی ہے۔
لندن :(اردودنیا.اِن/ایجنسیز)فٹبال کی دنیا کے عظیم ترین کھلاڑیوں میں شمار کیے جانے والے کرسٹیانو رونالڈو نے اپنی شریکِ حیات جورجینا روڈریگیز سے شادی کے لیے پرتگال کے جزیرے مادیرا میں واقع 511 سال قدیم فونشال کیتھیڈرل کو منتخب کر لیا ہے۔ یہ مقام نہ صرف تاریخی اہمیت رکھتا ہے بلکہ رونالڈو کے آبائی شہر کی پہچان بھی ہے۔
رپورٹس کے مطابق 40 سالہ رونالڈو اور 31 سالہ جورجینا نے رواں برس اگست میں اپنی منگنی کا اعلان کیا تھا، جو دونوں کے درمیان نو سالہ تعلق کے بعد انجام پائی۔ پرتگالی اخبار "جورنال دا مادیرا” کا کہنا ہے کہ رونالڈو ورلڈ کپ 2026 کے اختتام کے بعد موسمِ گرما میں شادی کرنے کا ارادہ رکھتے ہیں۔
رونالڈو نے اپنی شادی کی مذہبی تقریب کے لیے فونشال کیتھیڈرل کا انتخاب کیا ہے، جو 1514 میں تعمیر ہوا تھا اور مادیرا کی سب سے قدیم عبادت گاہ کے طور پر مشہور ہے۔ اس کا مرکزی محل وقوع اسے علاقے کا مذہبی و تاریخی مرکز بناتا ہے۔
یہ مقام رونالڈو کے لیے جذباتی طور پر بھی اہم ہے، کیونکہ یہ اس اسپتال سے صرف دو میل دور ہے جہاں وہ پیدا ہوئے تھے۔ اسی کے قریب وہ نیشنل یوتھ کلب بھی موجود ہے جہاں سے رونالڈو نے بچپن میں اپنا فٹبال کیریئر شروع کیا۔
رونالڈو اور جورجینا کی ملاقات 2016 میں اسپین کے ایک گوچی اسٹور میں ہوئی، جہاں جورجینا بطور سیلز اسسٹنٹ کام کرتی تھیں جبکہ رونالڈو ریال میڈرڈ کی نمائندگی کر رہے تھے۔ یہ ملاقات ایک مضبوط رشتے میں بدل گئی اور آج یہ جوڑا دنیا بھر کے مداحوں کی توجہ کا مرکز ہے۔
رونالڈو کے مطابق ان کے بچے اس شادی کے فیصلے کی سب سے بڑی وجہ بنے۔ دونوں کے دو مشترکہ بچے الانا (7 سال) اور بیلا (3 سال) ہیں، جبکہ رونالڈو کے پہلے سے تین بچے بھی ہیں: کرسٹیانو جونیئر (15 سال) اور 8 سالہ جڑواں میتھیو اور ایوا ماریا۔
جورجینا نے بطور ماڈل، کاروباری خاتون اور سوشل میڈیا اسٹار اپنی ایک الگ پہچان بنائی ہے، اور ان کا کیریئر بھی گزشتہ چند سالوں میں خاصا کامیاب رہا ہے۔ورلڈ کپ کے بعد رونالڈو کی اس تاریخی شادی کا انعقاد نہ صرف پرتگال بلکہ دنیا بھر کے مداحوں کے لیے ایک بڑا ایونٹ ثابت ہوگا۔
