مراد آباد: سسر نے بہو کی عصمت دری کے بعد بیٹے کو قتل کیا، عدالت نے عمر قید سنائی

نئی دہلی :(اردودنیا.اِن/ایجنسیز)اتر پردیش کے مراد آباد ضلع کے ایڈیشنل ڈسٹرکٹ اینڈ سیشن جج نے سسر کو عصمت دری کا مجرم قرار دیتے ہوئے اسے 10 سال کی سخت قید اور جرمانے کی سزا سنائی۔ عصمت دری کی شکایت پر سسر نے اپنے ہی بیٹے کو گولی مار کر قتل کر دیا تھا۔ عدالت نے قتل کے جرم میں عمر قید اور ایک لاکھ روپے جرمانے کی سزا بھی سنائی۔

معاملہ ماجھولا تھانہ علاقے کا ہے جہاں 28 نومبر 2020 کو ایک خاتون نے پولیس میں شکایت درج کرائی۔ اس نے بتایا کہ 25 نومبر کی رات شوہر گھر پر موجود نہیں تھا اور اسی دوران اس کے سسر نے اس کی عصمت دری کی۔ شوہر کے گھر آنے پر متاثرہ نے اسے پورا واقعہ بتایا۔ رات 11 بجے کے قریب شوہر نے اس واقعہ کے بارے میں والد سے بات کی تو جھگڑا شروع ہوگیا۔

اسی دوران بھابھی بھی موقع پر پہنچ گئی اور متاثرہ کو مارنے لگی۔ جھگڑے کے دوران سسر نے اپنا لائسنسی ریوالور نکالا اور بیٹے کو گولی مار دی۔ شدید زخمی حالت میں اسے اپیکس اسپتال لے جایا گیا جہاں علاج کے دوران اس کی موت ہوگئی۔

 پولیس نے سسر اور جیٹھانی کے خلاف آئی پی سی کی دفعہ 376 اور 302 کے تحت مقدمہ درج کیا ہے۔ تفتیش کے دوران پولیس نے صرف سسر کے خلاف چارج شیٹ داخل کی۔ عدالت نے اب دونوں فریقین کے دلائل سننے اور شواہد کا جائزہ لینے کے بعد اپنا فیصلہ جاری کیا ہے۔

اس کیس میں عدالت نے سسر کو دفعہ 376 کے تحت 10 سال قید بامشقت اور 50,000 روپے جرمانے کی سزا سنائی۔ عدالت نے کہا کہ جرمانہ ادا نہ کرنے کی صورت میں اسے مزید تین ماہ قید کی سزا بھگتنا ہوگی۔

دفعہ 302 کے تحت سسر کو عمر قید اور 100,000 روپے جرمانے کی سزا سنائی گئی ہے۔ اس رقم کا 90 فیصد متاثرہ کو دیا جائے گا۔ جرمانہ ادا نہ کرنے کی صورت میں مزید چھ ماہ قید بھگتنا ہو گی۔