منریگا کا نام بدلنے پر پرینکا گاندھی کا سوال،مہاتما گاندھی کا نام کیوں ہٹایا جا رہا ہے؟

نئی دہلی :(اردودنیا.اِن/ایجنسیز)کانگریس جنرل سکریٹری اور کیرالہ کے وایناڈ سے لوک سبھا رکن پرینکا گاندھی واڈرا نے مہاتما گاندھی نیشنل رورل ایمپلائمنٹ گارنٹی اسکیم (MGNREGA) کا نام تبدیل کرنے کے مرکزی حکومت کے فیصلے پر سخت تنقید کی ہے۔ منریگا کی جگہ نیا دیہی روزگار قانون لانے کی تیاریوں کے درمیان انہوں نے سوال اٹھایا کہ آخر مہاتما گاندھی کا نام اس اسکیم سے کیوں ہٹایا جا رہا ہے۔

پیر کے روز پارلیمنٹ کے احاطے میں صحافیوں سے بات کرتے ہوئے پرینکا گاندھی نے کہا کہ کسی قومی اسکیم کا نام تبدیل کرنے کی بھی ایک قیمت ہوتی ہے، جس کا بوجھ عوامی خزانے پر پڑتا ہے۔ انہوں نے سوال کیا، “وہ مہاتما گاندھی کا نام کیوں ہٹا رہے ہیں؟ اس کے پیچھے ان کا مقصد کیا ہے؟”

پرینکا گاندھی نے پارلیمنٹ میں جاری تعطل پر بھی مرکزی حکومت کو نشانہ بنایا۔ انہوں نے دعویٰ کیا کہ ایسا لگتا ہے کہ حکومت خود نہیں چاہتی کہ پارلیمنٹ صحیح طریقے سے کام کرے۔ ان کے مطابق اپوزیشن نے ایوان میں آلودگی جیسے اہم عوامی مسئلے پر بحث کا مطالبہ کیا، لیکن اس پر بھی گفتگو نہیں ہونے دی جا رہی۔

انہوں نے کہا، “حکومت خود پارلیمنٹ میں خلل ڈال رہی ہے۔ مجھے لگتا ہے کہ حکومت نہیں چاہتی کہ پارلیمنٹ بالکل کام کرے۔ ہم نے آلودگی پر بحث کا مطالبہ کیا، لیکن وہ بحث بھی نہیں ہو رہی ہے۔” پرینکا گاندھی کے اس بیان کو منریگا کے نام اور ڈھانچے میں مجوزہ تبدیلیوں کے خلاف اپوزیشن کے بڑھتے احتجاج کے طور پر دیکھا جا رہا ہے۔