’’میرے چھ بچے ہیں، آپ کو چار بچے پیدا کرنے سے کون روک رہا ہے؟‘‘ اسدالدین اویسی کا بی جے پی لیڈر کو دو ٹوک جواب

حیدرآباد :(اردودنیا.اِن/ایجنسیز)آل انڈیا مجلس اتحاد المسلمین کے صدر اسدالدین اویسی نے بی جے پی لیڈر نوینیت رانا کے زیادہ بچے پیدا کرنے سے متعلق بیان پر سخت ردعمل ظاہر کیا ہے۔ اسدالدین اویسی نے طنزیہ انداز میں کہا کہ ان کے چھ بچے ہیں، اگر کوئی چار بچے پیدا کرنا چاہتا ہے تو آخر اسے کون روک رہا ہے۔

اسدالدین اویسی نے کہا کہ آبادی کے مسئلے کو مذہب اور سیاست سے جوڑنا غلط اور گمراہ کن ہے۔ ان کے مطابق اگر کوئی شخص زیادہ بچے پیدا کرنا چاہتا ہے تو یہ اس کا ذاتی فیصلہ ہونا چاہیے، لیکن اس معاملے کو خوف اور نفرت پھیلانے کے لیے استعمال کرنا مناسب نہیں۔

انہوں نے مہاراشٹر کے قوانین کا حوالہ دیتے ہوئے کہا کہ وہاں دو سے زیادہ بچوں والے افراد کو پنچایت انتخابات میں حصہ لینے کی اجازت نہیں دی جاتی۔ اویسی نے نشاندہی کی کہ یہی قانون پہلے تلنگانہ میں بھی نافذ تھا، جسے بعد میں تبدیل کر دیا گیا، جو حکومتی پالیسیوں میں تضاد کو ظاہر کرتا ہے۔

اسدالدین اویسی نے مزید کہا کہ آندھرا پردیش کے وزیر اعلیٰ چندرابابو نائیڈو بھی تین سے زیادہ بچوں کی بات کر چکے ہیں، اور یہ بیان راشٹریہ سویم سیوک سنگھ کے سربراہ موہن بھاگوت کی موجودگی میں دیا گیا تھا۔ انہوں نے کہا کہ اگر واقعی زیادہ بچوں کی بات کی جا رہی ہے تو پھر یہ سوال سب کے لیے یکساں ہونا چاہیے۔

واضح رہے کہ نوینیت رانا نے گزشتہ ماہ ایک بیان میں کہا تھا کہ کچھ لوگ زیادہ بچے پیدا کر کے ملک کی آبادیاتی ساخت کو بدلنے کی کوشش کر رہے ہیں، اس لیے ہندوؤں کو بھی تین سے چار بچے پیدا کرنے چاہئیں۔ ان کے اس بیان کے بعد سیاسی اور سماجی حلقوں میں شدید ردعمل دیکھنے میں آیا تھا۔