بیوی کے موٹے ہونے پر شوہر نے کر دیا قتل، گوگل پر طریقے تلاش کرکے زہر منگوایا

کڈپہ 06 مئی:(اردودنیا.اِن/ایجنسیاں) آندھرا پردیش کے کڈپہ ضلع کے پروڈدٹور علاقے میں ایک دل دہلا دینے والا واقعہ سامنے آیا ہے، جہاں ایک شوہر نے اپنی بیوی کو صرف اس لیے قتل کر دیا کہ وہ موٹی ہو گئی تھی۔ اس واقعہ نے پورے علاقے میں سنسنی پھیلا دی ہے۔

اطلاعات کے مطابق پروڈدٹور کے ایشور ریڈی نگر کے رہنے والے بدرپلی کرن کی شادی آٹھ سال قبل مدنور کی رہنے والی پدما سے ہوئی تھی۔ دونوں کی ایک بیٹی بھی ہے۔ ابتدائی چند برسوں تک ان کی ازدواجی زندگی معمول کے مطابق چلتی رہی، لیکن بچی کی پیدائش کے بعد پدما کا وزن بڑھنے لگا۔

پولیس کے مطابق کرن اپنی بیوی کے بڑھتے وزن سے ناخوش تھا اور اسے لوگوں کے درمیان لے جانے میں شرمندگی محسوس کرتا تھا۔ اسی ذہنیت کے تحت اس نے بیوی کو راستے سے ہٹانے کا منصوبہ بنایا۔ بتایا جا رہا ہے کہ اس نے انٹرنیٹ پر ایسے طریقے تلاش کیے جن کے ذریعے کسی کو بغیر شک پیدا کیے قتل کیا جا سکے۔

جانچ میں یہ بھی سامنے آیا کہ ملزم نے آن لائن تقریباً 80 ہزار روپے مالیت کا ایک زہریلا محلول منگوایا۔ پارسل موصول ہونے کے بعد اس نے اپنی بیوی کو اس کے میکے سے واپس پروڈدٹور بلایا اور اگلے دن کھانے میں زہر ملا کر کھلا دیا۔

زہر کھانے کے بعد پدما بے ہوش ہو کر کومہ جیسی حالت میں چلی گئی۔ الزام ہے کہ اسی دوران کرن نے تکیے سے اس کا منہ دبا کر اس کی سانس روک دی، جس سے اس کی موت ہو گئی۔

پولیس کو نعش کے معائنے کے دوران شبہ ہوا، جس کے بعد سخت پوچھ تاچھ میں ملزم نے اپنا جرم قبول کر لیا۔ پولیس نے کرن کو گرفتار کر لیا ہے اور اس کے خلاف سخت قانونی کارروائی شروع کر دی گئی ہے۔

تفتیشی حکام اب اس زاویے سے بھی جانچ کر رہے ہیں کہ آخر اتنے خطرناک زہریلے مادے آن لائن فروخت کرنے والے لوگ کون ہیں۔ اس واقعہ نے آن لائن دستیاب خطرناک کیمیاوی اشیا کی نگرانی اور فروخت کے نظام پر بھی کئی سوالات کھڑے کر دیے ہیں۔