دہلی ہائی کورٹ نے رابرٹ واڈرا کو عبوری راحت دینے سے انکار کردیا، زمین سودے معاملے میں سمن برقرار

نئی دہلی 14 مئی:(اردودنیا.اِن/ایجنسیز)دہلی ہائی کورٹ نے شکوہ پور، ہریانہ زمین سودے اور مبینہ منی لانڈرنگ معاملے میں رابرٹ واڈرا کو بڑا جھٹکا دیتے ہوئے انہیں عبوری راحت دینے سے انکار کردیا ہے۔ عدالت نے واڈرا کی اس درخواست کو فوری طور پر قبول نہیں کیا جس میں انہوں نے سمن پر روک لگانے کی اپیل کی تھی۔

عدالت نے اس معاملے میں انفورسمنٹ ڈائریکٹوریٹ کو بھی نوٹس جاری کرتے ہوئے جواب طلب کیا ہے۔ یہ معاملہ شکوہ پور، ہریانہ میں زمین کے ایک متنازع سودے اور مبینہ منی لانڈرنگ سے متعلق ہے۔

دراصل، دہلی کی راؤس ایونیو عدالت نے 15 اپریل کو ای ڈی کی جانب سے داخل کردہ فردِ جرم پر نوٹس لیتے ہوئے رابرٹ واڈرا سمیت دیگر ملزمان کو 16 مئی کو عدالت میں حاضر ہونے کے لیے سمن جاری کیے تھے۔

انفورسمنٹ ڈائریکٹوریٹ نے گزشتہ سال جولائی میں اس کیس میں فردِ جرم داخل کی تھی۔ یہ پہلا موقع تھا جب کسی تفتیشی ایجنسی نے رابرٹ واڈرا کے خلاف کسی فوجداری معاملے میں باضابطہ فردِ جرم دائر کی۔

اطلاعات کے مطابق اپریل 2025 میں انفورسمنٹ ڈائریکٹوریٹ نے اس معاملے میں رابرٹ واڈرا سے مسلسل تین دن تک پوچھ گچھ بھی کی تھی۔ تفتیشی ایجنسی کا دعویٰ ہے کہ زمین کے اس سودے میں مالی بے ضابطگیوں اور منی لانڈرنگ کے پہلوؤں کی جانچ کی جارہی ہے۔