ملک معاشی مسائل سے دوچار، مودی اٹلی میں ٹافیاں بانٹ رہے ہیں: راہل گاندھی

نئی دہلی 20 مئی:(اردودنیا.اِن/ایجنسیز) کانگریس کے سینئر رہنما اور لوک سبھا میں قائدِ حزبِ اختلاف راہل گاندھی نے وزیر اعظم نریندر مودی پر سخت طنز کرتے ہوئے کہا ہے کہ ملک معاشی مشکلات سے دوچار ہے، جبکہ وزیر اعظم بیرونِ ملک ٹافیاں بانٹنے میں مصروف ہیں۔ راہل گاندھی کا یہ بیان اٹلی میں وزیر اعظم مودی اور اٹلی کی وزیر اعظم جارجیا میلونی کی ایک وائرل ویڈیو کے بعد سامنے آیا ہے۔

راہل گاندھی نے سماجی رابطے کے پلیٹ فارم ’ایکس‘ پر لکھا کہ ’’معاشی طوفان سر پر ہے اور ہمارے وزیر اعظم اٹلی میں ٹافیاں بانٹ رہے ہیں۔‘‘ انھوں نے مزید کہا کہ ’’کسان، نوجوان، خواتین، مزدور اور چھوٹے تاجر پریشانیوں کا شکار ہیں، جبکہ وزیر اعظم مسکراتے ہوئے ویڈیوز بنا رہے ہیں اور بی جے پی کے رہنما تالیاں بجا رہے ہیں۔‘‘ کانگریس رہنما نے اس پورے معاملے کو ’’قیادت نہیں بلکہ تماشہ‘‘ قرار دیا۔

دراصل اٹلی کی وزیر اعظم جارجیا میلونی نے وزیر اعظم مودی کے ساتھ اپنی ملاقات کی ایک مختصر ویڈیو سماجی رابطے کی ویب سائٹ پر شیئر کی تھی۔ اس ویڈیو میں وزیر اعظم مودی انھیں ’میلوڈی‘ ٹافی تحفے کے طور پر پیش کرتے ہوئے دکھائی دے رہے ہیں۔ ویڈیو میں میلونی کہتی ہیں کہ انھیں بہت اچھی ٹافی ملی ہے، جس کے بعد دونوں رہنما مسکراتے ہوئے ’’میلوڈی‘‘ کہتے ہیں۔ یہ ویڈیو سوشل میڈیا پر تیزی سے وائرل ہو گئی اور سیاسی حلقوں میں بحث کا موضوع بن گئی۔

اطلاعات کے مطابق دونوں رہنماؤں کی ملاقات ظہرانے کے دوران ہوئی، جس کے بعد وزیر اعظم مودی اور جارجیا میلونی ایک ہی گاڑی میں کولیسیم کے دورے کے لیے روانہ ہوئے۔ سفارتی حلقوں میں اسے ’’کار سفارت کاری‘‘ سے تعبیر کیا جا رہا ہے، جس کے ذریعے دو ممالک کے درمیان دوستانہ تعلقات کا پیغام دیا جاتا ہے۔

کانگریس صدر ملکارجن کھڑگے نے بھی وزیر اعظم نریندر مودی پر سخت تنقید کرتے ہوئے کہا کہ مودی چاہتے ہیں کہ عوام ان کی تقاریر کی ’’میلوڈی‘‘ میں مگن رہیں، جبکہ حکومت کی ’’لوٹ کھسوٹ‘‘ اور عوامی بدحالی کا سامنا کرتے رہیں۔ سماجی رابطے کے پلیٹ فارم ’ایکس‘ پر جاری اپنے بیان میں کھڑگے نے کہا کہ گزشتہ گیارہ برسوں میں مودی حکومت کے دور میں ہر ہندوستانی پر اوسط قرض میں گیارہ گنا اضافہ ہوا ہے، جبکہ 229 بڑے صنعت کاروں اور نئے شامل ہونے والے 26 ارب پتیوں کی مجموعی دولت 97.50 لاکھ کروڑ روپے سے تجاوز کر چکی ہے۔ انھوں نے حکومت پر امیروں کو فائدہ پہنچانے اور عام عوام کو معاشی دشواریوں میں دھکیلنے کا الزام بھی عائد کیا۔

کانگریس نے اس معاملے کو عوامی مسائل سے جوڑتے ہوئے حکومت پر تنقید کی ہے، جبکہ بی جے پی رہنماؤں نے اسے خوشگوار سفارتی تعلقات کی علامت قرار دیا ہے۔ سیاسی مبصرین کے مطابق یہ ویڈیو اب ہندوستان کی داخلی سیاست میں ایک نئی لفظی جنگ کا سبب بن گئی ہے۔