پٹرول اور ڈیزل کی قیمتوں میں پھر اضافہ، 10 دن میں تیسری بار بڑھے دام
عوام پر مہنگائی کا بوجھ
نئی دہلی 23 مئی:(اردودنیا.اِن/ایجنسیز) بھارت میں پٹرول اور ڈیزل کی قیمتوں میں ہفتہ کو ایک بار پھر اضافہ کردیا گیا۔ گزشتہ 10 دنوں کے دوران ایندھن کی قیمتوں میں یہ تیسرا اضافہ ہے، جس کے بعد عوام پر مہنگائی کا مزید بوجھ پڑا ہے۔
سرکاری تیل کمپنیوں کی جانب سے جاری تازہ نرخوں کے مطابق دہلی میں پٹرول کی قیمت میں 87 پیسے فی لیٹر اضافہ کیا گیا ہے، جس کے بعد نئی قیمت 99.51 روپے فی لیٹر ہوگئی۔ اس سے قبل پٹرول 98.64 روپے فی لیٹر فروخت ہورہا تھا۔
اسی طرح ڈیزل کی قیمت میں 91 پیسے فی لیٹر اضافہ کیا گیا ہے۔ دہلی میں ڈیزل اب 92.49 روپے فی لیٹر دستیاب ہوگا، جبکہ اس کی سابقہ قیمت 91.58 روپے فی لیٹر تھی۔
15 مئی سے تیل کمپنیوں نے ایران پر امریکہ۔اسرائیل حملوں کے بعد مشرقِ وسطیٰ میں پیدا ہونے والی کشیدگی اور عالمی منڈی میں خام تیل قیمتوں میں اضافے کے اثرات مرحلہ وار عوام تک منتقل کرنا شروع کیے ہیں۔ 15 مئی کو پٹرول اور ڈیزل کی قیمتوں میں 3 روپے فی لیٹر اضافہ کیا گیا تھا، جبکہ 19 مئی کو مزید 90 پیسے فی لیٹر بڑھائے گئے تھے۔
تین مرحلوں میں کیے گئے حالیہ اضافوں کے بعد پٹرول اور ڈیزل تقریباً 5 روپے فی لیٹر مہنگے ہوچکے ہیں۔ 15 مئی کو کیا گیا اضافہ گزشتہ چار برسوں میں بھارت میں ایندھن قیمتوں میں پہلا بڑا اضافہ تھا۔
تیل کمپنیوں کی جانب سے قیمتوں میں مرحلہ وار اضافہ اسی انداز میں کیا جارہا ہے جیسا اپریل 2022 میں کیا گیا تھا، جب اتر پردیش سمیت چند اہم ریاستوں کے اسمبلی انتخابات کے بعد پٹرول اور ڈیزل نرخ بڑھائے گئے تھے۔
اپوزیشن جماعتوں نے الزام عائد کیا ہے کہ وزیر اعظم نریندر مودی کی قیادت والی حکومت نے حالیہ ریاستی انتخابات میں ووٹ حاصل کرنے کے مقصد سے ایندھن قیمتوں میں اضافے کو مؤخر رکھا۔
سرکاری ریفائنری ذرائع کا کہنا ہے کہ نقصانات کی تلافی کے لیے مزید قیمتیں بڑھانا ناگزیر ہے۔بھارت پٹرولیم کے چیئرمین نے اس ہفتے کہا تھا کہ حالیہ اضافے کے باوجود کمپنی کو ڈیزل پر فی لیٹر 25 سے 30 روپے اور پٹرول پر 10 سے 14 روپے تک کا خسارہ برداشت کرنا پڑ رہا ہے۔
بھارت کی وزارتِ تیل واضح کرچکی ہے کہ حکومت کی جانب سے ریفائنری کمپنیوں کو مالی مدد فراہم کرنے کا فی الحال کوئی منصوبہ نہیں ہے۔
Bharat Petroleum، Indian Oil Corporation اور Hindustan Petroleum ملک بھر میں موجود ایک لاکھ تین ہزار سے زائد پٹرول پمپوں کے 90 فیصد سے زیادہ نیٹ ورک پر کنٹرول رکھتی ہیں اور عموماً ایندھن قیمتوں کا تعین مشترکہ طور پر کرتی ہیں۔
