فلائٹ ٹکٹ منسوخی فیس پر حکومت سخت، مسافروں کو بھاری چارجز سے راحت ملنے کی امید
آن لائن ٹکٹ منسوخی کی من مانی پر حکومت ایکشن میں، مسافروں کو فائدہ ہوگا
نئی دہلی 25 مئی:(اردودنیا.اِن/ایجنسیز) فلائٹ ٹکٹ کینسل کرنے پر کاٹے جانے والے بھاری چارجز سے پریشان مسافروں کے لیے راحت کی خبر سامنے آئی ہے۔ حکومت نے آن لائن ٹکٹ بکنگ پلیٹ فارمز کی من مانی پر سخت رویہ اختیار کرتے ہوئے تحقیقات کا حکم دے دیا ہے۔
اکثر دیکھا گیا ہے کہ آن لائن فلائٹ ٹکٹ بکنگ کے دوران صارفین کو آسان سہولیات کا وعدہ کیا جاتا ہے، لیکن جب کسی وجہ سے ٹکٹ منسوخ کرنا پڑے تو ریفنڈ کے نام پر بڑی رقم کاٹ لی جاتی ہے۔ یہی معاملہ اب لاکھوں مسافروں کے لیے پریشانی کا سبب بن چکا ہے۔
صارفین کے امور کے مرکزی وزیر پرہلاد جوشی نے کہا ہے کہ آن لائن ٹریول پلیٹ فارمز سے اب جواب طلب کیا جائے گا۔ محکمۂ صارفین کے امور اور سینٹرل کنزیومر پروٹیکشن اتھارٹی مشترکہ طور پر اس بات کی جانچ کریں گے کہ آیا کمپنیاں ایئر لائن قوانین کی خلاف ورزی کرتے ہوئے صارفین سے حد سے زیادہ کینسلیشن فیس وصول کر رہی ہیں یا نہیں۔
حکومت اس بات کا بھی جائزہ لے گی کہ بکنگ کے وقت صارفین کو تمام شرائط، منسوخی کے قواعد اور اضافی چارجز واضح طور پر دکھائے جا رہے ہیں یا نہیں۔ حکام کے مطابق اگر کسی بھی پلیٹ فارم کی جانب سے اضافی فیس کے ذریعے مسافروں کو گمراہ کرنے کی کوشش کی گئی تو اس کے خلاف کارروائی کی جا سکتی ہے۔
یہ تحقیقات کسی ایک کمپنی تک محدود نہیں رکھی گئی بلکہ تمام بڑے آن لائن بکنگ پورٹلز کو اس دائرے میں شامل کیا گیا ہے۔ حکومت کا ماننا ہے کہ غیر شفاف قواعد اور پوشیدہ چارجز کے باعث عام مسافر مالی نقصان اٹھاتے ہیں۔
ماہرین کا کہنا ہے کہ اس اقدام سے نہ صرف منسوخی کے قوانین میں شفافیت آئے گی بلکہ مسافروں کا اعتماد بھی بحال ہوگا۔ ساتھ ہی امید ظاہر کی جا رہی ہے کہ مستقبل میں آن لائن بکنگ پلیٹ فارمز کو صارفین کے مفادات کا زیادہ خیال رکھنا پڑے گا۔
