والد کے انتقال کے بعد چہلم کی رسومات میں شرکت کے لیے انجینئر رشید کو عبوری ضمانت

نئی دہلی 26 مئی:(اردودنیا.اِن/ایجنسیز) دہلی ہائی کورٹ نے جموں و کشمیر کے بارہمولہ سے رکن پارلیمنٹ عبدالرشید شیخ المعروف انجینئر رشید کو اپنے والد کی وفات کے بعد ہونے والی رسومات میں شرکت کے لیے 25 جون سے 30 جون تک عبوری ضمانت دے دی ہے۔

جسٹس پرتھیبا ایم سنگھ اور جسٹس مدھو جین پر مشتمل بنچ نے منگل کو اپنے حکم میں کہا کہ موجودہ عبوری ضمانت کی مدت ختم ہونے کے بعد انجینئر رشید کو 2 جون کو دوبارہ خودسپردگی کرنی ہوگی۔ عدالت نے اپنے حکم میں کہا کہ 40ویں دن کی مذہبی اور خاندانی رسومات میں شرکت کے لیے انہیں دوبارہ محدود مدت کی عبوری ضمانت دی جا رہی ہے۔

عدالت نے یہ بھی واضح کیا کہ 25 جون سے 30 جون تک دی جانے والی عبوری ضمانت انہی شرائط کے تحت ہوگی جو اس وقت ان پر لاگو ہیں۔ اس سے قبل 18 مئی کو دہلی ہائی کورٹ نے والد کے انتقال کے بعد انہیں 2 جون تک عبوری ضمانت دی تھی۔

عدالت نے حکم دیا تھا کہ عبوری ضمانت کے دوران انجینئر رشید کے ساتھ سادہ لباس میں کم از کم دو پولیس اہلکار ہر وقت موجود رہیں گے۔

انجینئر رشید سال 2019 میں گرفتاری کے بعد سے گزشتہ چھ برس سے زیادہ عرصے سے حراست میں ہیں۔ قومی تحقیقاتی ایجنسی نے ان پر الزام عائد کیا ہے کہ وہ غیر قانونی مالی معاونت اور شدت پسند تنظیموں سے متعلق ایک مبینہ سازش کا حصہ تھے۔